ट्रकने कट मारल्याने बस खड्ड्यात
जळगाव (प्रतिनिधी)-
भरधाव ट्रकने कट मारल्याने प्रवाशांनी भरलेली एसटी बस खड्ड्यात गेली. सुदैवाने ही बस झुडपांमध्ये अडकली आणि अनर्थ टळला. हा अपघात जळगावमधील आहुजानगर ते द्वारकानगर थांब्यादरम्यान घडला. अपघातानंतर ट्रक चालकाने घटनास्थळावरून पळ काढला पोलिसांनी त्याच्याविरोधात तक्रार दाखल केली असून शोध घेतला जातोय.
निंभोरेहून जळगावला येणारी एसटी बस आहुजानगर स्टॉपजवळ होती. दरम्यान भरधाव ट्रकने कट मारल्यामुळे एसटी चालकाचे नियंत्रण सुटले आणि बस समांतर रस्त्याच्या खड्ड्यात उतरली. सुदैवाने बस झुडपांमध्ये अडकली आणि अनर्थ टळला. बस ज्या खड्यावर अडकली तो खड्डा मोठा होता. प्रवाशांचे दैव बलवत्तर म्हणून दुर्घटना टळली. बसमध्ये जवळपास ५० प्रवासी होते, मात्र कुणालाही दुखापत झाली नाही. ट्रॅक चालकाने घटनास्थळावरून पळ काढला.
