एसीबीच्या पथकाने तिघांना लाच स्वीकारतांना रंगेहाथ पकडले
साईमत/जळगाव/प्रतिनिधी :
बांबू लागवडीच्या परवानगीसाठी ३६ हजारांची लाच मागितल्या प्रकरणी वन परिक्षेत्र अधिकारी आणि त्यांचे दोन सहकारी लाचलुचपत प्रतिबंधक खात्याच्या जाळ्यात अडकले आहे. त्यांना अटक केली असल्याचे संबंधितांनी सांगितले. कारवाईमुळे परिसरात एकच खळबळ उडाली आहे. दरम्यान, ही कारवाई एसीबीचे उपअधीक्षक योगेश ठाकूर यांच्या मार्गदर्शनाखाली पोलीस निरिक्षक हेमंत नागरे आणि त्यांच्या सहकाऱ्यांनी केली.
सविस्तर असे की, पारोळा तालुक्यातील सडावण येथे रहिवासी असणाऱ्या व्यक्तीला बांबू लागवड करायची होती. त्याच्या सोबत त्याच्या परिचयातील तिघे अशा चौघांना बांबू लागवडीची परवानगी हवी असल्याने त्यांनी सामाजिक वनीकरण खात्याच्या कार्यालयात संपर्क साधला. येथे आरएफओ मनोज कापुरे यांच्याशी त्यांनी चर्चा केली. एका फाईलचे प्रत्येकी दहा हजार असे चार फाईल्सच्या चाळीस हजार रूपयांची लाच त्यांना मागण्यात आली. त्याअनुषंगाने संबंधित व्यक्तीने लाचलुचपत प्रतिबंधक खात्याकडे तक्रार केली. या तक्रारीची खातरजमा करून मंगळवारी, ६ ऑगस्ट रोजी सापळा रचण्यात आला.
३६ हजारांची लाच देण्यावर झाले एकमत
तक्रारदाराने पुन्हा आरएफओ कापुरे यांच्याशी संवाद साधला. त्यात चर्चेअंती ३६ हजार रूपयांची लाच देण्यावर एकमत झाले. पंचासमक्ष हा प्रकार झाल्यानंतर लाच स्वीकारतांना त्यांना अटक केली. त्यात वन परिक्षेत्र अधिकारी मनोज बबनराव कापुरे यांच्यासह त्यांच्या कार्यालयातील लिपीक निलेश मोतीलाल चांदणे आणि कंत्राटी कर्मचारी कैलास भरत पाटील अशा तिघांना एसीबीच्या पथकाने लाच स्वीकारतांना अटक केली आहे.
