भारतातील बारा ज्योतिर्लिंगांचे दर्शन घडविणारी विशेष प्रदर्शनी उभारण्यात आली आहे.
साईमत/जळगाव/प्रतिनिधी
महाशिवरात्रीच्या पावन पर्वाच्या पार्श्वभूमीवर शहरात भक्ती, श्रद्धा आणि अध्यात्मिक ऊर्जेचा विलक्षण संगम अनुभवायला मिळत आहे. ब्रह्माकुमारीज संस्थेतर्फे प्रथमच भगवान महाकालेश्वर ज्योतिर्लिंग यांच्या स्मरणार्थ भव्य आणि प्रेरणादायी शिवलिंगाची प्रतिकृती उभारण्यात आली असून, या दिव्य दर्शन सोहळ्यामुळे जळगावकरांना आध्यात्मिक अनुभूतीची अनोखी संधी उपलब्ध झाली आहे.
रायसोनी स्कूलसमोरील बेंडाळे ग्राऊंड, पिंप्राळा रोड येथे सुमारे वीस हजार चौरस फुटांच्या विस्तीर्ण परिसरात ही भव्य ज्योतिर्लिंग प्रतिकृती साकारण्यात आली आहे. प्रवेशद्वारातून आत पाऊल टाकताच भाविकांना शिवभक्तीने भारलेले वातावरण अनुभवायला मिळते. मंत्रोच्चार, शिवनामस्मरण आणि प्रसन्न सजावटीमुळे संपूर्ण परिसर शिवमय झाल्याची अनुभूती येते. जागृत शिवलिंगाची ही प्रतिकृती केवळ दर्शनापुरती मर्यादित नसून, भक्तांच्या आत्मिक उन्नतीसाठी विविध आध्यात्मिक उपक्रमांचीही प्रभावी मांडणी येथे करण्यात आली आहे.
दर्शन स्थळी स्वतंत्र मेडिटेशन कक्ष, प्रवचन कक्ष आणि भारतातील बारा ज्योतिर्लिंगांचे दर्शन घडविणारी विशेष प्रदर्शनी उभारण्यात आली आहे. या प्रदर्शनीत महाकालेश्वर ज्योतिर्लिंगसह देशभरातील पवित्र ज्योतिर्लिंगांची माहिती दृश्यरूपाने सादर करण्यात आली आहे. त्यामुळे भाविकांना एकाच ठिकाणी संपूर्ण ज्योतिर्लिंगांचे आध्यात्मिक महत्त्व जाणून घेण्याची संधी मिळत आहे.
शिवतत्त्व, आत्मज्ञान आणि जीवनमूल्यांचा खरा अर्थ समजावा या उद्देशाने ‘शिवध्वज’ संकल्पनेवर आधारित विशेष प्रदर्शनी कक्ष तयार करण्यात आला आहे. चित्रे, प्रेरणादायी संदेश आणि आध्यात्मिक विचारांच्या माध्यमातून परमात्मा शिव यांचा सत्य परिचय करून देण्याचा प्रयत्न येथे केला जात आहे. विशेषतः तरुण पिढीला अध्यात्माकडे आकर्षित करण्यासाठी आधुनिक तंत्रज्ञानाचा वापर करून सादरीकरण करण्यात आले आहे.
या संपूर्ण उपक्रमाचे आयोजन ब्रह्माकुमारीजच्या जळगाव सबझोन इन्चार्ज राजयोगिनी यांच्या प्रेरणा व मार्गदर्शनाखाली करण्यात आले आहे. शहरातील विविध भागांतून भाविक मोठ्या संख्येने येथे उपस्थित राहत असून, जळगावकरांच्या आध्यात्मिक सेवेसाठी हा उपक्रम महत्त्वपूर्ण ठरत आहे. सकाळी ८ ते रात्री १० वाजेपर्यंत हे दर्शन २० फेब्रुवारीपर्यंत सर्वांसाठी खुले ठेवण्यात आले असून, महाशिवरात्री निमित्त जळगावात शिवभक्तीचा हा महासंगम विशेष आकर्षण ठरत आहे.
