दारूच्या बाटल्या गायब, लोखंडी ग्रील वाकवून चोरट्यांचा प्रवेश
साईमत जळगाव प्रतिनिधी
शहरातील चोऱ्यांचे सत्र थांबण्याचे नाव घेत नसल्याचे स्पष्ट करत, चोरट्यांनी आता आपले लक्ष मद्यविक्री केंद्रांकडे वळवले आहे. जळगाव तालुका पोलीस ठाण्याच्या हद्दीतील आव्हाणे रोडवरील ‘हॉटेल न्यू नाईट किंग अँड वाईन पॅलेस’ या बिअर बारमध्ये मंगळवारी रात्री धाडसी चोरीची घटना घडली आहे.
याबाबत मिळालेल्या माहितीनुसार, हॉटेलचे मालक अमोल गोपाळ साळी (वय ३९, राहणार रा. राजराजेश्वरी अपार्टमेंट, जळगाव) यांचे बार मंगळवारी साडेअकरा वाजेपासून २५ मार्च रोजी सकाळी ८ वाजेपर्यंत बंद होते. या काळात अज्ञात चोरट्यांनी हॉटेलच्या खिडकीच्या लोखंडी ग्रीलला शिताफीने वाकवून आत प्रवेश केला.
कोणाचेही लक्ष नसताना चोरट्यांनी काउंटर आणि स्टोअरमधून १५,८३० रुपये किमतीच्या विदेशी दारू आणि बिअरच्या बाटल्या लंपास केल्या. ही चोरी बुधवारी सकाळी ८ वाजता समोर आली.
या घटनेनंतर अमोल साळी यांनी जळगाव तालुका पोलीस ठाण्यात अज्ञात चोरट्यांविरोधात फिर्याद दिली असून, पोहेकॉ धनराज पाटील या तपास प्रकरणाची चौकशी करत आहेत.
शहरात सतत वाढत चाललेल्या चोरीच्या घटनांमुळे स्थानिक व्यापारी आणि नागरिकांमध्ये सुरक्षिततेबाबत चिंता वाढली आहे, तर पोलीस प्रशासनाचे लक्ष या प्रकाराकडे वेधले गेले आहे.
