ग्रामस्थांनाही सामील करून आनंदात रंगला बालआनंद मेळावा
साईमत/पहुर ता .जामनेर/ प्रतिनिधी
भराडी येथील जिल्हा परिषद शाळेत आयोजित ‘बालआनंद मेळावा’ बुधवारी उत्साहात पार पडला. या मेळाव्यात विद्यार्थ्यांनी आपल्या कल्पकतेचा, कौशल्याचा आणि उद्योजकतेचा परिचय दिला.
जवळपास ७० स्टॉल विद्यार्थ्यांनी लावले होते, ज्यामध्ये विविध प्रकारचे स्वादिष्ट खाद्यपदार्थ, खेळणी, शालेय उपयोगी साहित्य तसेच परिसरातील उपयुक्त वस्तूंची विक्री करण्यात आली. या उपक्रमातून विद्यार्थ्यांना व्यवहारज्ञान, आत्मविश्वास, सर्जनशीलता आणि सहकार्याची भावना विकसित होण्यास मदत झाली.
कार्यक्रमाचे अध्यक्ष शंकर पाटील यांनी मेळाव्याचे उद्घाटन केले. विद्यार्थ्यांच्या आनंदात भर पडण्यासाठी प्रसिद्ध कार्टून पात्र‘मोटू पतलू’चे कलाकार शाळेत उपस्थित होते आणि त्यांनी विद्यार्थ्यांचे विशेष मनोरंजन केले.
विद्यार्थ्यांनी आर्थिक व्यवहार करताना आधुनिक तंत्रज्ञानाचा उपयोग करत ‘फोन पे’ आणि ‘गुगल पे’ द्वारे व्यवहार केले. यामुळे विद्यार्थ्यांमध्ये व्यवहारिक कौशल्यासोबत डिजिटल तंत्रज्ञान हाताळण्याचा अनुभव देखील मिळाला. अंदाजे २० ते २५ हजार रुपयांची उलाढाल झाली, ज्यातून खऱ्या अर्थाने विद्यार्थ्यांमध्ये उद्योजकतेचा व व्यवसायिक दृष्टिकोनाचा विकास झाला.
मेळाव्याचा लाभ केवळ विद्यार्थ्यांपुरता मर्यादित राहिला नाही; शाळेतील शिक्षक, आजूबाजूच्या ग्रामस्थ आणि पंचक्रोशीतील विद्यार्थीही या आनंदोत्सवाचा आनंद घेतला. याप्रसंगी संतोष पाटील, संभाजी पाटील, सत्यवान पाटील, संभाजी हरी पाटील, ज्ञानेश्वर पाटील, विजय पाटील, संभाजी हावडे यांसारखे मान्यवर उपस्थित होते.
कार्यक्रमाच्या यशस्वीतेसाठी शाळा व्यवस्थापन समितीचे अध्यक्ष योगेश डवणे, उपाध्यक्ष मनिषा खोडके आणि सदस्य संभाजी पाटील, योगेश पाटील, स्वाती पाटील, सीमा पाटील, पूजा धनगर, कैलास पाटील, नाना पाटील, समाधान कोळी, बाळू पाटील, मंगला आनंदा इंगळे, तसेच मुख्याध्यापक देविदास पवार आणि शिक्षक शरद वासनकर, समाधान ठाकरे, भूपेंद्र अहिरे, सोनाली ठाकरे, अमोल पाटील, अविनाश शिंदे, आकांक्षा सोनवणे यांनी परिश्रम घेतले.
या बालआनंद मेळाव्याने विद्यार्थ्यांमध्ये केवळ कौशल्य आणि सर्जनशीलतेला चालना दिलीच, तर सामाजिक, आर्थिक आणि तंत्रज्ञानाच्या बाबतीतही आत्मविश्वास वाढवला.
