साईमत, पाचोरा : प्रतिनिधी
चोरी करणाऱ्या चोरट्याला पकडण्याचा प्रयत्न करत असलेल्या पोलीस कर्मचाऱ्याला लोखंडी टॉमीने मारहाण करून गंभीर जखमी केल्याची घटना घडली आहे. याप्रकरणी पाचोरा पोलीस ठाण्यात एकावर गुन्हा दाखल केला आहे.
सविस्तर असे की, शहर पोलीस ठाण्याचे पोलीस कर्मचारी दिलीप पाटील आणि पोलीस नाईक सचिन पवार हे शुक्रवारी, १८ ऑगस्ट रोजी मध्यरात्रीच्या सुमारास गस्तीवर होते. त्यावेळी संशयित आरोपी अशोकसिंग ईश्वरसिंग बावरी (वय २२, रा. मलकापूर) हा संशयितरित्या फिरत होता. त्यानंतर तो चोरी करून पळत होता. दरम्यान, पोलिसांनी त्याचा पाठलाग करुन त्याला पकडले. त्यानंतर अशोकसिंग बावरी या संशयित आरोपीने पोलीस कर्मचारी सचिन पवार यांच्यावर लोखंडी टॉमीने मारहाण करून गंभीर दुखापत केली. याप्रकरणी पो.हे.कॉ. दिलीप पाटील यांनी दिलेल्या फिर्यादीवरून संशयित आरोपी अशोकसिंग ईश्वरसिंग बावरी याच्याविरोधात गुन्हा दाखल केला आहे. तपास पोलीस निरीक्षक राहुल खताळ करीत आहे.
