साईमत, जामनेर : प्रतिनिधी
लोकसभा सार्वत्रिक निवडणुकीच्या अनुषंगाने जामनेर विधानसभा मतदारसंघातील ३२९ मतदान केंद्रावर मतदानाची टक्केवारी वाढविण्यासाठी मतदार मित्र व मतदार सखी यांची नेमणूक केली आहे. यासंदर्भात जामनेर येथील पंचायत समितीच्या कार्यालयात संबंधित मतदार मित्र आणि मतदार सखी यांच्यासाठी नुकतीच प्रशिक्षणासह आढावा बैठक घेण्यात आली. बैठकीला उपजिल्हाधिकारी अर्चना मोरे, उपविभागीय पोलीस अधिकारी धनंजय येरुळे, तहसीलदार नानासाहेब आगळे, जामनेर पोलीस स्टेशनचे पोलीस निरीक्षक किरण शिंदे, पहूर पोलीस स्टेशनचे पोलीस निरीक्षक सचिन सानप यांची प्रमुख उपस्थिती होती.
मतदानाची टक्केवारी वाढविण्यासाठी केंद्रनिहाय उत्स्फूर्त स्वयंसेवक यांना मतदार मित्र तर महिला मतदानाची टक्केवारी वाढविण्यासाठी संबंधित मतदान केंद्रावरील आशा सेविका, अंगणवाडी सेविका, महिला पोलीस पाटील, महिला सरपंच यांची मतदार सखी म्हणून नेमणूक करण्यात आली. जामनेर विधानसभा मतदारसंघात सहाय्यक निवडणूक निर्णय अधिकारी तथा उपजिल्हाधिकारी रोहयो अर्चना मोरे यांच्या संकल्पनेतून लोकसभा सार्वत्रिक निवडणुकीच्या अनुषंगाने मतदानाची टक्केवारी वाढविण्यासाठी नियोजन करण्यात आले.
पोलीस पाटील यांचीही आढावा बैठक
यावेळी तालुक्यातील पोलीस पाटील यांचीही आढावा बैठक घेण्यात आली. बैठकीत आदर्श आचारसंहितेच्या अनुषंगाने निवडणूक आयोगाने दिलेल्या निर्देशाप्रमाणे करावयाच्या कार्यवाहीबाबत सूचना देण्यात आल्या. कायदा व सुव्यवस्था तसेच प्रतिबंधात्मक कारवाई संदर्भात गाव पातळीवर निवडणुकीच्या पार्श्वभूमीवर कायदा व सुव्यवस्था तसेच सामाजिक शांतता अबाधित राहण्यासाठी करावयाच्या कारवाईच्या अनुषंगाने सूचना देण्यात आल्या.
