साईमत, जळगाव : प्रतिनिधी
शहरातील वीज महावितरण कंपनीचे गिरणा पंपिंग सबस्टेशन अंतर्गत महाबळ येथील कार्यालयात कामावर हजर असलेल्या कर्मचाऱ्याला विद्युत पुरवठा खंडित केल्याच्या कारणावरून हरीविठ्ठल नगरातील एकाने बेदम मारहाण करून कार्यालयावर दगडफेक केल्याची घटना बुधवारी, २२ मे रोजी रात्री १२.४५ मिनिटांनी घडली. याप्रकरणी रामानंदनगर पोलीस ठाण्यात तक्रार दाखल केली आहे.
जळगाव शहरातील गिरणा पंपिंग रस्त्यावरील महावितरण कंपनीचे सबस्टेशनच्या अंतर्गत महाबळ येथे कार्यालय आहे. या ठिकाणाहून खंडेराव नगर, हरीविठ्ठल नगर, वाघ नगर, रामानंदनगर, समता नगर येथे विद्युतपुरवठा करण्याचे काम केले जाते. २२ मे रोजी रात्री १२.४५ वाजता हरीविठ्ठल नगरमध्ये राहणारा दीपक सपकाळे यांच्यासह एक जण असे दोन जण महाबळ कार्यालयात येथे आले. त्याठिकाणी कर्मचारी किरण दत्तात्रय सपकाळे (रा. दादावाडी) हे कामावर हजर होते. दरम्यान, दीपक सपकाळे हा तेथे येऊन कर्मचारी किरण सपकाळे यांना लाईट चालू, बंद का करतो? असे बोलून कार्यालयात ओढून बेदम मारहाण केली. तसेच कार्यालयाच्या बाहेर येऊन दोघांनी कार्यालयावर दगडफेक करुन निघून गेले.
ही घटना घडल्यानंतर सकाळी ११ वाजता महावितरण कंपनीच्या विभागातील सर्व कर्मचाऱ्यांनी रामानंदनगर पोलीस ठाण्यात धाव घेऊन तक्रार दिली आहे. सायंकाळी मारहाण करणाऱ्या विरोधात रामानंदनगर पोलीस ठाण्यात गुन्हा दाखल करण्याचे काम सुरू होते.