जनजागृती करणारा आवाज थांबला; बारूळकर यांचे निधन
साईमत / नांदेड
जिल्ह्यातून एक अत्यंत दु:खद घटना समोर आली असून बहुजन चळवळीचे ज्येष्ठ अभ्यासक, शिवव्याख्याते आणि प्रबोधनकार हभप मधुकर महाराज बारूळकर यांचे रस्ते अपघातात दुर्दैवी निधन झाले आहे. त्यांच्या आकस्मिक निधनामुळे नांदेडसह संपूर्ण परिसरात शोककळा पसरली आहे.
मिळालेल्या माहितीनुसार, नांदेड शहरातील ढवळे कॉर्नर परिसरात हा भीषण अपघात घडला. एका कार्यक्रमानंतर मधुकर महाराज बारूळकर हे दुचाकीने आपल्या गावी परतत असताना पाठीमागून येणाऱ्या भरधाव टिप्परने त्यांच्या दुचाकीला जोरदार धडक दिली. अपघाताची तीव्रता इतकी होती की त्यांचा जागीच मृत्यू झाला. घटनास्थळी उपस्थित नागरिकांनी तत्काळ धाव घेतली; मात्र वैद्यकीय मदत मिळण्यापूर्वीच त्यांचा मृत्यू झाल्याचे स्पष्ट झाले.
मधुकर महाराज बारूळकर हे आपल्या प्रभावी वक्तृत्वशैलीमुळे आणि प्रबोधनपर विचारांमुळे समाजात विशेष ओळख निर्माण करणारे व्यक्तिमत्त्व होते. शिवचरित्र, सामाजिक समता आणि बहुजन हिताचे विचार त्यांनी आपल्या व्याख्यानांतून सातत्याने मांडले. त्यांच्या जाण्याने सामाजिक व प्रबोधन क्षेत्रात मोठी पोकळी निर्माण झाल्याची भावना व्यक्त होत आहे. विविध सामाजिक, शैक्षणिक व राजकीय क्षेत्रातील मान्यवरांनी त्यांच्या निधनाबद्दल तीव्र दु:ख व्यक्त करत श्रद्धांजली अर्पण केली आहे.
दरम्यान, राज्यात अलीकडील काळात वाढत्या अपघातांच्या घटनांमुळे रस्ते सुरक्षेचा प्रश्न पुन्हा एकदा ऐरणीवर आला आहे. बेफिकीर वेग, नियमांचे उल्लंघन आणि निष्काळजीपणा यामुळे अशा दुर्घटना घडत असल्याचे वारंवार दिसून येत आहे. नागरिकांनी वाहतूक नियमांचे काटेकोर पालन करावे, तसेच प्रशासनानेही रस्ते सुरक्षा उपाययोजनांवर अधिक भर द्यावा, असे आवाहन यानिमित्ताने करण्यात येत आहे.
