संभाजीनगर : वृत्तसंस्था
बहिणीला भेटायला आलेल्या २४ वर्षीय नराधमाने बहिणीच्या घरासमोर राहणाऱ्या एका ८५ वर्षीय वृद्ध महिलेची हत्या केल्याची धक्कादायक घटना उघडकीस आली आहे. दारूच्या नशेत घरात घुसून त्या महिलेवर नराधमाने बलात्कार करून तिचा साडीने खून केल्याची खळबळजनक घटना वैजापूर तालुक्यातील लोणी खुर्द येथे मंगळवारी उघडकीस आली. दरम्यान, या प्रकरणी तात्काळ पोलिसांनी आरोपीच्या मुसक्या आवळल्या आहेत.
गुलाब आबा बेलदार (वय २४, रा. भोजे चिंचपुरे ता. पाचोरा जि.जळगाव) असे नराधमाचे नाव आहे.दरम्यान, या प्रकरणी अधिक माहिती अशी की, मूळचा पाचोरा येथील रहिवासी असलेला गुलाब हा त्याची बहीण लोणी खुर्द येथे राहते. या बहिणीला भेटण्यासाठी तो तिथे आला होता. बहिणीच्या घरासमोर राहणाऱ्या वृद्ध महिलेवर त्याने नजर ठेवली. लोणी खुर्द येथे ८५ वर्षीय महिला गेल्या अनेक वर्षांपासून एकटी राहत होती.
दरम्यान, सोमवारी रात्री महिला झोपी गेली. यावेळी पहाटे दोनच्या सुमारास गुलाब हा दारूच्या नशेत वृद्ध महिलेच्या घरात शिरला. त्याने वृद्ध महिलेवर बलात्कार करण्याचा प्रयत्न केला. महिलेवर बलात्कार करून तिचे डोके भिंतीवर आपटले. या झालेल्या झटापटीत महिलेच्या डोक्याला जबर मार लागला होता. त्यानंतर गुलाबने वृद्ध महिलेस साडीच्या साह्याने गळा आवळून खून केला.
आवाज झाल्याने शेजारील नागरिक महिलेच्या घराशेजारी आले. गुलाबने ‘‘घरात चोर आले होते, त्यांनी मला मारहाण केली ते पळून गेले”, असा बहाणा त्याने केला. ही माहिती ग्रामस्थांनी पोलिसांना दिली. पोलीस आल्यानंतर नागरिकांमध्ये उभा असलेल्या गुलाबवर पोलिसांचा संशय गेला. दरम्यान, पोलिसांनी त्याच्या मुसक्या आवळल्या.
