सोयगावच्या धारकुंड धारेश्वर येथील घटना
साईमत/सोयगाव/प्रतिनिधी
येथून जवळील धारेश्वर (धारकुंड) येथील धबधब्याखाली अंघोळ करत असताना पाय घसरून कुंडात पडल्याने एका तरुण भाविकाचा मृत्यू झाल्याची घटना सोमवार (दि.२६) दुपारी दोन ते अडीच वाजेच्या दरम्यान घडली. तरुणाचे नाव गजानन राघु माने (वय ३५, रा. केऱ्हाळा, ता. सिल्लोड) असे आहे. श्रावण सोमवारनिमित्त गजानन दर्शनासाठी आला होता. दर्शनाआधीच त्याचा कुंडात बुडून मृत्यू झाला आहे.
वाडीसुतांडा गावापासून सहा कि.मी. अंतरावरील धारकुंड धारेश्वर महादेवाचे तीर्थक्षेत्र आहे. येथे तीनशे फुटावरुन कोसळणारा धबधबा पर्यटकांना आकर्षित करीत असतो. अत्यंत घनदाट जंगलात हे धार्मिक स्थळ आहे. पायवाटद्वारे येथे भक्तगण मोठ्या प्रमाणावर येत असतात. श्रावण महिन्यात भाविकांची मोठ्या प्रमाणावर गर्दी होत असते. श्रावण सोमवार असल्याने सिल्लोड तालुक्यातील केहऱ्हाळा येथील गजानन माने व चार ते पाच मित्रांसोबत धारकुंड धारेश्वर येथील महादेवाचे दर्शन घेण्यासाठी आले होते. येथे आल्यावर तीनशे फुटावरुन कोसळणारा धबधबाखाली अंघोळ करण्यासाठी गजानन व मित्र गेल्यावर गजाननचा पाय घसरला. तेथील मोठ्या कुंडात जाऊन पडला. येथील कुंडास मोठमोठ्या कपारी असल्याने गजानन पाण्यात दिसला नाही.
पट्टेदार पोहणाऱ्यांनी मृतदेह काढला बाहेर
घटनेची माहिती मिळताच घटनास्थळी उपनिरीक्षक रज्जाक शेख जमादार संदीप सुसर, राजेंद्र बर्डे, विकास दुबेले पोहोचले. तेथे काही पट्टेदार पोहणाऱ्यांनी सायंकाळी पाच वाजता गजानन मानेचा मृतदेह बाहेर काढला. मृत गजाननच्या पश्चात आई, वडील, पत्नी मुलगा, एक मलगी, तीन भाऊ, तीन बहिणी असा परिवार आहे.
