साईमत, जळगाव/पारोळा : प्रतिनिधी
जिल्ह्यातील पारोळा शहरात भाजीपाला विक्रेता त्याच्याच लावलेल्या हात गाडीवर पैशांचा हिशेब करत होता. त्याचवेळी अचानक त्या ठिकाणच्या खांबावरील विजेची तार कोसळली आणि त्यात भाजीपाला विक्रेत्याचा मृत्यू झाला. पारोळा शहरातील बूधनाथ मठा जवळील महाराष्ट्र रेस्टॉरंटजवळ शनिवारी, सायंकाळी ७.३० ते ८ वाजेच्या सुमारास घडली. परमेश्वर संतोष महाजन (वय ४२, रा. पेंढारपूर, पारोळा) असे मयत भाजीपाला विक्रेत्याचे नाव आहे. दरम्यान, भाजीपाला विक्रेत्यावर संकट कोसळून त्यांच्या जीवावर बेतल्याने त्यांचा मृत्यू झाला आहे. भाजीपाला विक्रेत्याच्या मृत्यूमुळे सर्वत्र हळहळ व्यक्त होत आहे.
सविस्तर असे की, परमेश्वर महाजन हे शनिवारी नेहमीप्रमाणे पारोळा शहरातील बाजारपेठेतील हाकेच्या अंतरावरील हातगाडीवर भाजीपाल्याचे दुकान लावतात. शनिवारी रिमझिम पाऊस सुरु होता. ते सायंकाळी भाजीपाला विकून पैशांचा हिशोब लावत असतानाच अचानक याठिकाणी असलेल्या खांबावरील विजेची तार तुटून परमेश्वर महाजन यांच्या अंगावर कोसळली.
याठिकाणी प्रत्यक्ष उपस्थित असलेल्या नागरिकांनी तात्काळ घटनास्थळी धावत काठीच्या सहाय्याने परमेश्वर यांच्या अंगावर पडलेली विद्युत तार बाजुला केली. त्यानंतर त्यांना तातडीने खासगी रुग्णालयात हलविले. यावेळी याठिकाणच्या नागरिकांनी घटनेची माहिती महावितरण विभागाच्या कार्यालयाला दिली. त्यानंतर वीज पुरवठा खंडित करण्यात आला होता. परमेश्वर यांना खासगी रुग्णालयातून पारोळा शहरातील कुटीर रुग्णालयात दाखल केले होते. तेथील वैद्यकीय अधिकाऱ्यांनी परमेश्वर महाजन यांना मृत घोषित केले.
मोठा अनर्थ टळला
पारोळा शहरातील मुख्य बाजारपेठ असल्याने या ठिकाणी सायंकाळी नागरिकांची गर्दी होत असते. मात्र, रिमझिम सुरू असलेल्या पावसामुळे गर्दी कमी होती. त्याठिकाणी गर्दी असती तर कदाचित मोठी दुर्घटना घडली असती, असा जनतेतून चर्चेचा सूर उमटला.