मक्याच्या आड गांजाची शेती! गडखांब शिवारात अमळनेर पोलिसांची पहाटे धडक; एक बिघा क्षेत्र उध्वस्त
साईमत/अमळनेर/प्रतिनिधी :
तालुक्यातील गडखांब शिवारात अमळनेर पोलिसांनी केलेल्या धडक कारवाईत गांजाची एक बिघा शेती उध्वस्त करण्यात आली असून ओला व सुका गांजा जप्त करण्यात पोलिसांना मोठे यश मिळाले आहे. या प्रकरणी गडखांब येथील शेतकरी सुरेश लोटन पाटील याला ताब्यात घेण्यात आले असून पुढील कायदेशीर प्रक्रिया सुरू आहे.
पोलीस निरीक्षक दत्तात्रय निकम यांना गोपनीय माहिती मिळाली होती की गडखांब शिवारातील गट क्रमांक २३२४ मध्ये एका शेतकऱ्याने गांजाची लागवड केली आहे. माहितीची खातरजमा झाल्यानंतर त्यांनी उपविभागीय पोलीस अधिकारी विनायक कोते यांची परवानगी घेतली. कारवाईसाठी तहसीलदार रुपेशकुमार सुराणा यांना पंचनामा कामासाठी बोलावण्यात आले.
त्यानंतर पोलीस उपनिरीक्षक भगवान शिरसाठ, शरद काकळीज, नामदेव बोरकर यांच्यासह हेड कॉन्स्टेबल मिलिंद सोनार आणि पोलीस कर्मचारी विनोद संदानशिव, प्रशांत पाटील, निलेश मोरे, नितीन मनोरे, सुनील तेली, विनोद सोनवणे, राहुल पाटील, उदय बोरसे, सिद्धांत शिसोदे, गणेश पाटील, संजय सोनवणे, श्यामल पारधी, निलेश पाटील, विनोद पाटील आदींच्या पथकाने दि. ७ रोजी पहाटे सुमारे सहा वाजता छापा टाकला.
छाप्यात सुरेश लोटन पाटील याच्या शेतात मक्याच्या पिकासोबत गांजाची लागवड केल्याचे उघड झाले. सुमारे सहा फूट उंचीची गांजाची झाडे उगवलेली होती. शेतात पाच ते सात गोण्या ओला गांजा बांधून ठेवलेला आढळून आला, तर एका ठिकाणी गांजा वाळवण्यासाठी ठेवण्यात आल्याचेही दिसून आले. चौकशीदरम्यान संबंधित शेतकऱ्याने काही दिवसांपूर्वी गांजा विकल्याची कबुली दिल्याचे समजते.
या कारवाईदरम्यान फॉरेन्सिक पथकाने पंचनामा सुरू केला असून जप्त करण्यात आलेल्या गांजाचे नमुने तपासणीसाठी पाठवण्यात आले आहेत. गांजाची लागवड, साठवणूक व विक्रीप्रकरणी संबंधितांविरुद्ध कठोर कायदेशीर कारवाई करण्यात येणार असल्याचे पोलिसांकडून सांगण्यात आले.
अमळनेर तालुक्यात अशा प्रकारे मक्याच्या आड गांजाची शेती केल्याचे उघडकीस आल्याने परिसरात मोठी खळबळ उडाली असून, अवैध अंमली पदार्थांच्या विरोधात पोलिसांनी आपली कारवाई आणखी तीव्र करण्याचा इशारा दिला आहे.
