बोदवड पोलिसांकडून जळगावला गुन्हा वर्ग
साईमत/बोदवड/प्रतिनिधी :
शहरातील एका २२ वर्षीय युवतीला गौरव मुकुंदा साठे (वय २३, रा. बोदवड) याने सोशल मीडियाच्या माध्यमातून ओळख निर्माण केली. त्यानंतर तिला जळगाव येथील एका हॉटेलमध्ये नेऊन तिच्यावर अत्याचार केला. तिच्यावरील अत्याचार करत असतानाचे फोटो काढले. तसेच व्हिडीओही केला. व्हिडीओ सोशल मीडियावर व्हायरल करण्याची धमकी दिली. धमकी दिल्यानंतर वेळोवेळी ऑनलाइन ॲपच्या माध्यमातून युवतीकडून रक्कमही उकळल्याचा धक्कादायक प्रकार उघडकीस आला आहे. याप्रकरणी बोदवड पोलीस स्टेशनला गुन्हा दाखल केल्याचे पोलिसांनी सांगितले. दरम्यान, बोदवड शहरातील ही युवती बाहेरगावी शिक्षण घेत असल्याची माहिती मिळाली आहे.
वारंवार होणाऱ्या पैशाच्या मागणीला त्रासून अखेर युवतीने याबाबत तिच्या आईकडे कैफियत मांडली. त्यानंतर आई-वडिलांनी युवतीला विश्वासात घेतल्यावर तिने सर्व माहिती कथन केली. तसेच युवतीच्या आई-वडिलांसह मुलाला जीवे ठार करण्याची धमकीही आल्याचे सांगण्यात आले.
ही माहिती बोदवड पोलिसांना दिल्यावर याप्रकरणी रात्री उशिरापर्यंत गुन्हा नोंदविण्याचे काम सुरू असल्याचे पोलिसांनी सांगितले. मात्र, हा गुन्हा जळगाव पोलिसांच्या हद्दीत घडला असल्याने हा गुन्हा शून्य क्रमांकाने जळगाव पोलिसांकडे वर्ग केल्याचे सांगण्यात आले.
