जळगाव, प्रतिनिधी | येथील जिल्हा परिषदेतील पहिल्या फळीतील 10 ते 12 सर्वपक्षीय सदस्यांनी आपसात तब्बल 25 कोटी रूपयांचे कामे वाटून घेतली आहेत.यासंदर्भात राष्ट्रवादीच्या जिल्हा परिषद सदस्या प्रा. डॉ. नीलम पाटील यांनी माजी मंत्री एकनाथ खडसेंकडे तक्रार केली होती. खडसेंनी गुरूवारी प्रा. डॉ. पाटील यांच्यासह उपमुख्यमंत्री अजित पवार, ग्रामविकास मंत्री हसन मुश्रीफ यांची भेट घेवून तक्रार केली आहे.
जिल्हा परिषदेतील पहिल्या फळीतील सर्वपक्षाचे सदस्य एकत्र आले आहेत. जिल्हा परिषदेच्या विविध योजनांच्या तब्बल 25 कोटी रूपयांचे कामांचे वाटप या सदस्यांनी आपसात केले आहे. अन्य सदस्यांच्या गटामध्ये किरकोळ कामे देण्यात आली आहेत. काही सदस्यांनी 1 कोटी रूपयांची कामे घेतली तर काही सदस्यांना केवळ 2 ते 3 लाखांचीच कामे मिळाली आहेत.
असमान निधी वाटपाचे सूत्र गेल्या पाच वर्षापासून सुरू असून त्यात सर्वच पक्षांचे गटनेते आघाडीवर आहेत. गटनेते कामे मिळत असल्याने चुप्पी साधून आहेत. याच प्रकारातून राष्ट्रवादीच्या सदस्या प्रा. डॉ. नीलम पाटील यांनी माजी मंत्री एकनाथ खडसेंसोबत मुंबई गाठून ग्रामविकास मंत्री हसन मुश्रीफ, उपमुख्यमंत्री अजित पवार , ग्रामविकास विभागाच्या सचिवांची भेट घेवून हा प्रकार लक्षात आणून दिला. दरम्यान, याप्रकरणाची आता तातडीने चौकशी केली जाणार आहे.
शुक्रवारी चौकशीचे पत्र निघणार यासंदर्भात तातडीने ग्रामविकास विभागाकडून जिल्हा परिषदेची कामे आहे त्यात टप्प्यात थांबविली जाणार आहेत. या कामांची चौकशी करण्यासाठी शुक्रवारी ग्रामविकास विभागाच्या सचिवांकडून जिल्हाधिकारी व जिल्हा परिषद मुख्य कार्यकारी अधिकारी यांना पत्र काढले जाणार असल्याची माहिती प्रा. डॉ. नीलम पाटील यांनी दिली.
