श्रीराम मंदिराच्या उभारणीत योगदान देण्याचे संत बालयोगी यांचे आवाहन

चोपडा ः प्रतिनिधी
सर्वांना सात्विक भावनेने मदत करण्याचे आवाहन प्रभू श्रीरामाच्या जन्मस्थळी निर्माण होणार्‍या अद्भूत मंदिर उभारणीसाठी प्रत्येकाने मदत करावी, असे आवाहन महामंडलेश्वर संत बालयोगी महाराजांनी केले. चोपडा तालुका श्रीराम मंदीर निधी संकलन समितीच्या कार्यकर्त्यांनी त्यांची नुकतीच भेट घेतली.यावेळी ते त्यांच्याशी बोलत होते.
बालयोगी महाराज म्हणाले की, प्रत्येक जण प्रात:समयी प्रभू श्रीरामाचे स्मरण करुन दिवसाची सुरूवात करतो. अनेक वर्षांच्या संघर्षानंतर राम मंदिर निर्माण कार्य सुरू होत आहे. श्रीरामाने आपल्या जीवनात अनेक सुखद क्षण दिले. आयुष्य जगण्याचा आनंद निर्माण केला आहे. आता आपल्याला प्रत्येकाला रामासाठी काही करण्याचा, देण्याचा योग आला आहे. जगातील प्रत्येक भाविकाला अयोध्येत येताना विशाल राममंदिर पाहिल्यानंतर अलौकिक समाधान मिळावे. यादृष्टीने सर्वांनी सात्विक भावनेने मदत करावी. दरम्यान, महामंडलेश्वर संत बालयोगी महाराजांच्या हस्ते गोपाळ पाटील, नरेंद्र पाटील व नंदलाल पाटील यांनी श्रीराम मंदिराचे उभारणीसाठीचे योगदान धनादेशाद्वारे प्रातिनिधीक स्वरुपात तालुका संघचालक डॉ.मनोज साळुंखे, तालुका कार्यवाह संदीप साळुंके यांच्याकडे सोपवले. यावेळी अनेक भाविकांनी राम मंदिरासाठी निधी सढळ हाताने दिला. राष्ट्रीय स्वयंसेवक संघाचे जिल्हा संघचालक राजेश पाटील, तालुका सहकार्यवाह संदीप सूर्यवंशी, शहर कार्यवाह मनोज विसावे उपस्थित होते.