जळगावहून इंदूरमार्गे दिल्लीसाठी त्रि-साप्ताहिक विमानसेवा २ मेपासून सुरू
साईमत जळगाव प्रतिनिधी
जळगावकरांसाठी हवाई प्रवासाच्या क्षेत्रात मोठी आनंदवार्ता समोर आली असून, शहराच्या विकासाच्या दृष्टीने एक महत्त्वाचा टप्पा गाठला गेला आहे. जळगाव विमानतळावरून आता दिल्ली आणि इंदूरसाठी थेट विमानसेवा सुरू होत असून, ही सेवा २ मे २०२६ पासून प्रायोगिक तत्त्वावर कार्यान्वित केली जाणार आहे.
Alliance Air या कंपनीमार्फत सुरू होणारी ही सेवा दिल्ली–इंदूर–जळगाव तसेच जळगाव–इंदूर–दिल्ली या मार्गावर आठवड्यातून तीन दिवस—मंगळवार, गुरुवार आणि शनिवार—अशी त्रि-साप्ताहिक स्वरूपात चालवली जाणार आहे. या नव्या हवाई जोडणीमुळे जळगावचे उत्तर भारताशी असलेले संपर्क अधिक मजबूत होणार आहेत.
या सेवेमुळे जळगावकर प्रवाशांना थेट राजधानी दिल्लीपर्यंत जलद आणि सोयीस्कर प्रवासाचा पर्याय उपलब्ध होणार आहे. विशेष म्हणजे या विमानसेवेचे तिकीट दर सुमारे ३,००० रुपयांपासून सुरू होत असल्याने सामान्य प्रवाशांनाही हा प्रवास परवडणारा ठरणार आहे. सध्या या सेवेसाठी बुकिंग सुरू झाले असून, प्रवाशांकडून उत्स्फूर्त प्रतिसाद मिळत आहे.
या विमानसेवेच्या मंजुरीसाठी राज्याचे मंत्री गिरीश महाजन, केंद्रीय मंत्री रक्षा खडसे, खासदार स्मिता वाघ आणि आमदार राजूमामा भोळे यांचे महत्त्वपूर्ण योगदान राहिले आहे. विशेषतः खासदार स्मिता वाघ यांनी गेल्या अनेक महिन्यांपासून केंद्र सरकार, नागरी विमान वाहतूक मंत्रालय तसेच विमान कंपन्यांकडे सातत्याने पाठपुरावा करून ही सेवा प्रत्यक्षात आणण्यात महत्त्वाची भूमिका बजावली आहे.
ही सेवा जळगावहून दिल्ली आणि इंदूरकडे जाणाऱ्या व्यावसायिक, विद्यार्थी तसेच धार्मिक प्रवाशांसाठी अत्यंत उपयुक्त ठरणार आहे. उत्तर भारतातील विविध शहरांशी हवाई जोडणी उपलब्ध झाल्यामुळे प्रवासाचा वेळ मोठ्या प्रमाणात वाचणार असून, पर्यटन आणि व्यावसायिक हालचालींनाही गती मिळणार आहे.
ही विमानसेवा १ मे ते ३१ मे २०२६ या कालावधीत प्रायोगिक स्वरूपात चालवली जाणार आहे. या काळात प्रवाशांचा प्रतिसाद आणि सेवेची व्यवहार्यता तपासली जाणार असून, समाधानकारक प्रतिसाद मिळाल्यास ही सेवा नियमित करण्यात येणार आहे. भविष्यात तिचा विस्तारही होण्याची शक्यता व्यक्त केली जात आहे.
जळगाव विमानतळासाठी ही सेवा एक मैलाचा दगड ठरणार असून, जिल्ह्याच्या औद्योगिक, व्यापारी आणि पर्यटन विकासाला यामुळे मोठी चालना मिळेल, असा विश्वास स्थानिक उद्योजक आणि प्रवासी संघटनांनी व्यक्त केला आहे. वाढत्या हवाई संपर्कामुळे गुंतवणुकीच्या नव्या संधी निर्माण होऊन जळगावच्या सर्वांगीण विकासाला वेग मिळेल, असेही मत व्यक्त करण्यात येत आहे.
वेळापत्रक :
दिल्लीहून उड्डाण : सायं. ४.४० वा.
इंदूर आगमन : सुमारे ४५ मिनिटांनी
जळगाव आगमन : सायं. ७.५५ वा.
जळगावहून परतीचे उड्डाण : रात्री ८.२० वा.
दिल्ली आगमन : रात्री ११.२० वा.
