साईमत / जळगांव / प्रतिनिधी
राज्यातील महिलांसाठी आनंदाची बातमी समोर आली आहे. ‘मुख्यमंत्री माझी लाडकी बहीण’ योजनेअंतर्गत फेब्रुवारी महिन्याच्या सन्मान निधीचे वितरण सुरू झाले असून लाभार्थ्यांच्या खात्यात १५०० रुपये जमा होण्यास सुरुवात झाली आहे. ही माहिती महिला व बालविकास मंत्री अदिती तटकरे यांनी दिली.
सामाजिक न्याय विभागाने फेब्रुवारी महिन्याचा हप्ता वितरित करण्यासाठी सुमारे २२७ कोटी रुपयांच्या निधीला मंजुरी दिली होती. त्यानुसार महिला व बालविकास विभागामार्फत निधी वितरणाची प्रक्रिया सुरू करण्यात आली आहे.
मंत्री अदिती तटकरे यांनी सोशल मीडिया प्लॅटफॉर्म ‘एक्स’वर पोस्ट करत सांगितले की, फेब्रुवारी महिन्याच्या सन्मान निधीचे वितरण तांत्रिक प्रक्रियेद्वारे सुरू झाले आहे. पुढील दोन ते तीन दिवसांत सर्व पात्र लाभार्थ्यांच्या आधार-संलग्न बँक खात्यात ही रक्कम जमा होणार आहे.
मुख्यमंत्री देवेंद्र फडणवीस यांच्या नेतृत्वाखालील महायुती सरकारची ‘लाडकी बहीण’ योजना ही महत्वाकांक्षी योजना असून, या अंतर्गत पात्र महिलांना दरमहा १५०० रुपये आर्थिक सहाय्य दिले जाते. महिला व बालविकास विभागामार्फत ही योजना राबवली जाते.
दरम्यान, जानेवारी महिन्याचा हप्ता २३ फेब्रुवारी रोजी वितरित करण्यात आला होता. त्यानंतर फेब्रुवारी महिन्याच्या हप्त्याकडे लाभार्थ्यांचे लक्ष लागले होते. अखेर हप्ता जमा होण्यास सुरुवात झाल्याने राज्यातील महिलांमध्ये समाधानाचे वातावरण आहे.
