शिधापत्रिका धारकांना प्रति कुटुंब ३ लिटर; एलपीजी तुटवडा हाताळण्यासाठी तात्पुरता उपक्रम
साईमत / जळगांव / प्रतिनिधी
देशातील मध्यपूर्वेतील युद्धजन्य परिस्थितीमुळे गॅस पुरवठ्यावर परिणाम झाला असून, नागरिक मोठ्या प्रमाणावर त्रस्त आहेत. व्यावसायिक गॅस पुरवठा काही नियमावलींमुळे बंद असताना, राज्य सरकारने तात्पुरते उपाय म्हणून घरगुती ग्राहकांसाठी केरोसीन वितरण सुरू करण्याचे पाऊल उचलले आहे.
केंद्र सरकारकडून राज्याला 37 लाख 44 हजार लिटर केरोसीन वाटपासाठी मंजुरी मिळाली असून, प्रत्येक शिधापत्रिका धारक कुटुंबाला ३ लिटर केरोसीन मिळणार आहे. राज्यातील जिल्हानिहाय केरोसीनचे वितरण मार्च-एप्रिल २०२६ मध्ये सरकारी तेल कंपन्यांकडून केले जाणार आहे. एकूण वाटपाचे ८५ टक्के केरोसीन पहिल्या पंधरवड्यात वितरित करण्याचे आदेश देण्यात आले आहेत.
शिधापत्रिका नसलेल्या कुटुंबांनाही उपलब्धतेनुसार केरोसीन मिळेल. तसेच, श्वेतपत्रिकाधारक देखील केरोसीन वितरणासाठी पात्र राहतील.
पंतप्रधान नरेंद्र मोदींनी देखील देशवासीयांना जागतिक बाजारपेठेत तणावपूर्ण परिस्थितीसाठी सज्ज राहण्याचे आवाहन केले आहे. घरगुती ग्राहकांना कुठलीही अडचण भासणार नाही, यासाठी राज्य शासन सातत्याने प्रयत्न करत आहे.
