अचानक रस्त्यावर आलेल्या कुत्र्यामुळे अपघात तरुणाचा मृत्यू
साईमत/यावल /प्रतिनिधी
तालुक्यातील साकळी फाट्याजवळ बुधवारी रात्री झालेल्या दुचाकी अपघातात लोहाराच्या ३५ वर्षीय जुल्फिकार ईसा तडवी यांचा दुर्दैवी मृत्यू झाला. प्राथमिक माहिती नुसार, रस्त्यावर अचानक आलेल्या कुत्र्यामुळे त्यांचा दुचाकीवरील ताबा सुटला आणि गंभीर अपघात झाला. यावल पोलिसांनी अकस्मात मृत्यूची नोंद केली आहे.
मिळालेल्या माहितीनुसार, जुल्फिकार तडवी (वय ३५, रा. लोहारा, ता. रावेर, जि. जळगाव) हे आपल्या दुचाकी क्रमांक एमएच-१९ डीजी-९५२३ वरून यावल ते मोहना मार्गावर जात होते. बुधवारी (४ मार्च) रात्री सुमारे ११ वाजेच्या सुमारास साकळी फाटा परिसरात त्यांच्या दुचाकीसमोर अचानक कुत्रा आला, ज्यामुळे नियंत्रण सुटले आणि ते गंभीरपणे जखमी झाले.
स्थानिकांनी तातडीने जुल्फिकार तडवी यांना ग्रामीण रुग्णालय, यावल येथे दाखल केले. वैद्यकीय तपासणीनंतर डॉक्टरांनी त्यांना मृत घोषित केले. या घटनेची माहिती साजीद हमिद तडवी (वय २२, व्यवसाय – फोटोग्राफर, रा. मोहना, ता. चोपडा) यांनी यावल पोलीस स्टेशनला दिली. पोलिसांनी अकस्मात मृत्यू नोंद क्रमांक १४/२०२६ नुसार भा.न्या.सं. कलम १९४ प्रमाणे नोंद केली आहे.वरिष्ठ पोलिस अधिकाऱ्यांना घटनेची माहिती देण्यात आली असून सहाय्यक पोलीस उपनिरीक्षक अर्जुन सोनवणे यांच्या नेतृत्वाखाली पुढील तपास सुरू आहे.
स्थानिक नागरिकांनी रस्त्यावर मोकाट जनावरांमुळे अपघातांची संख्या वाढत असल्याची चिंता व्यक्त केली असून प्रशासनाने यावर उपाययोजना कराव्यात अशी मागणी केली आहे. या दुर्दैवी घटनेमुळे कुटुंबावर दुःखाचा डोंगर कोसळला असून परिसरात शोककळा पसरली आहे.
