रोटरी क्लबच्या सभागृहात “अराजकीय’ विचारमंथन बैठकीला प्रतिसाद
साईमत/जळगाव/प्रतिनिधी :
आपले शहर सोन्याची बाजारपेठ आणि केळीसाठी विख्यात आहे. मात्र, शहराचा विकास रोडावला आहे. उदासीनता आहे, ती दूर सारून महाराष्ट्रातील आदर्श शहर म्हणून पुढे यावे, अशी ठाम भूमिका मायादेवी नगरातील रोटरी क्लबच्या सभागृहामध्ये झालेल्या “अराजकीय विचारमंथन बैठकीत” मांडण्यात आली. “जळगाव प्रथम” घोषवाक्याने सुजाण व सुशिक्षित नागरिकांचे एकत्रित व्यासपीठ बैठकीतून उभे राहिले. बैठकीचे आयोजन माजी आमदार ॲड. जयप्रकाश बाविस्कर यांच्या संकल्पनेतून करण्यात आले. गेल्या तीन महिन्यांपासून त्यांनी शहरातील मान्यवर नागरिक, उद्योजक, समाजसेवक व सुज्ञ नागरिकांच्या भेटी घेत त्यांच्या समस्या ऐकून घेतल्या. त्यातून अशा व्यासपीठाची निर्मिती झाली.
यावेळी माजी खासदार ईश्वरलाल जैन, माजी आमदार गुरुमुख जगवानी, डॉ. सुरेश पाटील, व्यापारी महामंडळ प्रतिनिधी, वक्ते मनोज गोविंदवार, देवयानी गोविंदवार, दिलीप नारखेडे, डॉ.पवन चांडक, रेडक्रॉस रक्तपेढीचे चेअरमन प्रसन्नकुमार रेदासनी आदी मान्यवर उपस्थित होते.
जळगाव शहरात औद्योगिक प्रगती आणि स्थैर्याचा अभाव. बेरोजगारीने शहरातील शिक्षित तरुण शहर सोडून जात आहेत. आपले खड्डेमय रस्ते आणि दर्जेदार पायाभूत सुविधांचा अभाव, सक्षम आरोग्य व्यवस्थेचा अभाव, स्वच्छ पाणीपुरवठा, जागोजागी मोकळ्या आणि हिरव्या जागा, प्लास्टिक मुक्ती व सार्वजनिक जागांचे संवर्धन, शिस्तबद्ध व परवडणारी सार्वजनिक वाहतूक व्यवस्था या मुद्द्यांवर सकारात्मक विचार मंथन करण्यात आले.
बैठकीत गिरीश पाटील (योगी), गनी मेमन, डॉ. राधेश्याम चौधरी, शिवराम पाटील, ॲड. जमील देशपांडे, संग्रामसिंग पाटील, कैलास कासार, पृथ्वीराज सोनवणे, गजानन मालपुरे यांनीही विचार व्यक्त केले. त्यांनी जळगाव शहराला उत्तम नियोजन, स्वच्छता व सक्षम नागरी सुविधा मिळवण्यासाठी प्रयत्न करायला हवेत, हे शहर सर्वांना आपले वाटेल, यासाठी उपाय केले पाहिजेत, असे सांगितले.
सर्व स्तरांतील नागरिकांची बैठकीला उपस्थिती
बैठकीच्या अखेरीस “जळगाव प्रथम” हे व्यासपीठ केवळ चर्चेपुरते मर्यादित न राहता, शहराच्या सर्वांगीण विकासासाठी ठोस पावले उचलेल आणि महाराष्ट्रात जळगावचे नाव एक आदर्श शहर म्हणून अभिमानाने घेतले जाईल, असा निर्धार व्यक्त झाला. बैठकीला डॉक्टर, वकील, उद्योजक, प्राध्यापक, शिक्षक, महिला व तरुणवर्ग अशा सर्व स्तरांतील नागरिकांची उपस्थिती होती. प्रास्ताविक ॲड. जयप्रकाश बाविस्कर यांनी केले तर सूत्रसंचालन हर्षल पाटील यांनी केले.
