सुमारे ४५ कोटी निधीतून रस्त्यांची होणार दर्जोन्नती
साईमत/अमळनेर/प्रतिनिधी
मुख्यमंत्री ग्रामसडक योजना टप्पा तीन अंतर्गत अमळनेर मतदारसंघातील अजून सहा ग्रामीण रस्त्यांचे भाग्य उजळले आहे. सुमारे ४५ कोटी निधीतून रस्त्यांची दर्जोन्नती होणार आहे. याबाबत ग्रामविकास विभागाच्यावतीने प्रशासकीय मान्यतेचे आदेश ८ ऑक्टोबर रोजी निघाले असल्याची माहिती मदत व पुनर्वसन मंत्री अनिल भाईदास पाटील यांनी दिली.
मंत्री अनिल पाटील यांच्या प्रयत्नांनी अमळनेर मतदारसंघांत नवीन रस्त्यांची मालिकाच अवतरली आहे. शहर व ग्रामीण भागात दळणवळणास वेग आला आहे. मारवड ते बोहरा, मारवड ते शहापूर, कळमसरे ते शहापूर, खेडी खवशी रस्ता आणि पळासदडे ते रामेश्वर जुनोने रस्ता अशा रस्त्यांची प्रचंड दुरवस्था झाल्याने मंत्री अनिल पाटील यांनी अशा रस्त्याच्या नूतनीकरणासाठी निधी मिळविल्याने ग्रामीण जनतेमध्ये समाधान व्यक्त होत आहे.
या रस्त्यांना मिळाली मंजुरी
मंजुरी मिळालेल्या रस्त्यांमध्ये प्रजिमा-४९ (मारवड) ते बोहरा रस्ता, एकूण लांबी ५.४००(कि.मी.) अंदाजित किमंत ४००.५७ (रु.लाख), मारवड खेडी वासरे ते शहापूर रस्ता एकूण लांबी १०.४०० (कि.मी.) अंदाजित किंमत १०३६.६८ (रु.लाख) ७०.५३ (रु.लाख), कळमसरे शहापूर ते इजिमा-७७ रस्ता (एक तास) एकूण लांबी ७.१०० (कि.मी.), अंदाजित किमंत ७४५.४१ (रु.लाख), रामा-३९ ते खेडी ढोक रस्ता, एकूण लांबी ३.००० (कि.मी.), अंदाजित किंमत २८४.०९ (रु.लाख), निंभोरा अमळगाव-खेडी-खवशी ते नांद्री रस्ता एकूण लांबी ११.३०० (कि.मी.) अंदाजित किंमत ११११.०७ (रु.लाख), पळासदळे-रामेश्वर ते जुनोने रस्ता एकूण लांबी १३.२५० (कि.मी.), अंदाजित किंमत ९०९.३८ (रु.लाख) असे एकूण ५०.४५० (कि.मी.) लांबीचे रस्ते ४४८७.२० (रु.लाख), निधीतून होणार आहे. विशेष म्हणजे पाच वर्ष देखभाल दुरुस्तीसह हे रस्ते मंजूर झाले असल्याने यासाठी २९६.०७ रु.लाख रकमेस मंजुरी देण्यात आली आहे.
मुख्यमंत्री, उपमुख्यमंत्र्यांसह मंत्र्यांचे मानले आभार
रस्त्यांना मंजूरी दिल्याबद्दल मंत्री अनिल पाटील यांनी मुख्यमंत्री ना.एकनाथ शिंदे, उपमुख्यमंत्री देवेंद्र फडणवीस, ना.अजित पवार, ग्रामविकास मंत्री गिरीष महाजन, पालकमंत्री गुलाबराव पाटील यांचे आभार व्यक्त केले आहेत.
