शेतकरी शिवसंवाद कार्यक्रमात शिवसेनेच्या नेत्या वैशाली सूर्यवंशी यांची टीका
साईमत/पाचोरा/प्रतिनिधी
मतदार संघात भ्रष्टाचार, दडपशाहीचे वातावरण आहे. यासह सर्वसामान्यांना अनेक समस्या भेडसावत आहेत. या समस्या सोडविण्याचे कोणतेही प्रयत्न विद्यमान आमदारांकडून होतांना दिसून येत नाही. म्हणून आमच्या मतदार संघांची जर काही खरी समस्या असेल तर ती ‘आमदारच’ आहे. त्यांच्या नाकर्तेपणामुळे मतदारसंघात अनेक समस्या उद्भवल्या असल्याचे प्रतिपादन वैशाली सूर्यवंशी यांनी केले. तालुक्यातील शेतकरी व सर्वसामान्य नागरिकांशी संवाद साधून त्यांच्या समस्यांचे निराकरण करण्यासाठी शिवसेना- उबाठाच्यावतीने मतदारसंघांत पक्षाच्या नेत्या वैशाली सूर्यवंशी यांच्या नेतृत्वाखाली शेतकरी शिवसंवाद यात्रा रथाचे तात्यांच्या पुतळ्याला अभिवादन आणि दोन शेतकरी दाम्पत्यांच्या हस्ते रथाचे पूजन करून ताईंनी हिरवा झेंडा दाखविला. मतदारसंघातील जनतेशी संवाद आणि आरओ तात्यांच्या स्वप्नातील भयमुक्त व भ्रष्टाचारमुक्त विकासाचे ध्येय घेऊन वैशाली सूर्यवंशी यांनी वाटचाल सुरू केली आहे. यात्रेच्या माध्यमातून त्या जनतेशी थेट संवाद साधत आहेत. त्यावेळी त्या बोलत होत्या.
केंद्र व राज्य शासनाच्या भ्रष्ट कारभारामुळे शेतकरी त्रस्त झाले आहेत. शेतीमालास नसलेला भाव, पीक विम्यातील अडचणी, हमीभाव, विक्री प्रणालीतील त्रुटी, सिंचन, वीज, नुकसान भरपाई, कर्ज पुरवठा, गिरणा नदीचे संवर्धन, शिक्षण, आरोग्य, व्यापार, उद्योग, बेरोजगारी, महागाई, पिण्याच्या पाण्याची टंचाई, महिलांवरील अत्याचार आदी समस्या कायम आहेत. आमदारांच्या नाकर्तेपणामुळे मानसिंगका मील, नगरदेवळा सूत गिरणी, कजगाव केळी धक्का, कासोदा साखर कारखाना, पाचोरा-जामनेर रेल्वे आदी अनेक महत्वाचे प्रश्न प्रलंबित आहे. यासंदर्भात वैशालीताई जनजागृती करणार आहे.
शेतकरी संवाद यात्रेचा ९ ते २८ सप्टेंबर पहिला टप्पा
याप्रसंगी पिचर्डे येथील कमलाबाई आनंदा पाटील, आनंदा श्रावण पाटील तसेच पळासखेडे येथील अनजाबाई ताराचंद भराडी, ताराचंद भराडी या दोन शेतकरी दाम्पत्यांच्या हस्ते रथाचे पूजन करण्यात आले. शेतकरी संवाद यात्रेचा पहिला टप्पा ९ ते २८ सप्टेंबरच्या दरम्यान पाचोरा तालुक्यात राबविण्यात येत आहे. १ ते १० ऑक्टोबरपर्यंत भडगाव तालुक्यात यात्रेचे आयोजन केले आहे. त्यात नगरदेवळा-बाळद गटात ९ ते १२ सप्टेंबरच्या दरम्यान यात्रा फिरणार आहे. १२ रोजी सकाळी अकरा वाजता नगरदेवळा येथे शेतकरी मेळावा होणार आहे. खडकदेवळा-लोहटार गटात १३ ते १६ तारखेच्या दरम्यान यात्रा फिरणार आहे. १६ रोजी पाचोऱ्यातील श्रीनाथ मंदिरात शेतकरी मेळावा होणार आहे. बांबरूड-कुरंगी गटात १८ ते १८ सप्टेंबरच्या दरम्यान शेतकरी शिवसंवाद यात्रा फिरणार आहे. या गटातील मेळावा २१ रोजी नांद्रा येथे होणार आहे. पिंपळगाव हरेश्वर-शिंदाड गटात २३ ते २६ तारखेच्या दरम्यान यात्रा फिरणार आहे. २६ रोजी पिंपळगाव हरेश्वरला मेळावा होणार आहे. वरखेडी गटात २७ रोजी यात्रा फिरणार असून शेतकरी मेळावा होणार आहे.
यांची होती उपस्थिती
कार्यक्रमाला उध्दव मराठे, शरद पाटील, राजेंद्र देवरे, ॲड.अभय पाटील, बालूअण्णा, दीपक पाटील, दादाभाऊ चौधरी, मनोहर चौधरी, योजना पाटील, मच्छिंद्र आबा, पप्पू राजपूत, पप्पू जाधव, भाऊसाहेब पाटील, ॲड. दीपक पाटील यांच्यासह पदाधिकारी, कार्यकर्ते उपस्थित होते.
