जळगाव : प्रतिनिधी
शहरातील पिंप्राळा हुडकोमध्ये एका विवाहित महिलेने तर तालुक्यातील मोहाडी शिवारात एका परप्रांतीय बांधकाम मजुराने गळफास घेऊन आत्महत्त्या केल्याच्या दोन वेगवेगळ्या घटना आज सकाळी उघडकीस आल्या. यामुळे पिंप्राळा हुडको परिसरात व मोहाडी शिवार परिसरात खळबळ उडाली आहे. दोघांच्या आत्महत्त्येमागील नेमके कारण समजू शकलेले नाही.
पहिला घटना शहरातील पिंप्राळा हुडको परिसरात घडली. आनंद श्रावण चौधरी (वय ३२, रा. पिंप्राळा, हुडको) हे पत्नी सुवर्णा आनंदा चौधरी (वय ३५), आई इंदूबाई चौधरी आणि दोन मुलांसह राहतात. आंनद चौधरी हे व्यवसायाच्या निमित्ताने धुळे येथे कामासाठी गेले होते. घरी पत्नी सुवर्णा आणि आई इंदूबाई होते. मध्यरात्री सुवर्णा चौधरी यांनी सर्वजण झोपले असतांना दोरीने छताला गळफास घेवून आत्महत्या केली. हा प्रकार सकाळी इंदूबाई यांच्या लक्षात आल्याने त्यांनी हंबरडा फोडला. आत्महत्येचे नेमके कारण कळू शकले नाही.
याप्रकरणी रामानंदनगर पोलीसांना कळविण्यात आले असता पोलिसांनी घटनास्थळी जावून घटनास्थळाचा पंचनामा केला. जिल्हा शासकीय महाविद्यालयात शवविच्छेदन करण्यात आले असून अंत्यसंस्कारासाठी मृतदेह नातेवाईकांच्या ताब्यात देण्यात आला आहे. रामानंद नगर पोलीस ठाण्यात अकस्मात मृत्यूची नोंद करण्यात आली असून पुढील तपास सपोनि संदीप परदेशी, पो.कॉ. सुनिल पाटील, पो.कॉ. रेवानंद साळुंखे हे करीत आहेत.
दुसरी घटना जळगाव तालुक्यातील मोहाडी शिवारात घडली. भिकूकुमार सिंग नंदलाल (वय २४, रा. झारखंड, ह.मु. जैन नगर मोहाडी शिवार, एमआयडीसी) हा तरुण शहरातील आरएमसी प्रपोर्शन बिल्डकॉन येथे गेल्या महिन्याभरापासुन मजूराचे काम करतो. बांधकामाच्या ठिकाणी एका पत्र्याच्या खोलीत त्यांचे मजूरांसह राहत होता. नेहमीप्रमाणे बांधकामाचे काम आटोपल्यानंतर भिकू कुमार हा काल सायंकाळी ७ वाजता खोलीवर गेला. खोलीवर इतर सहकारी देखील राहत होते. मात्र गुरुवारी सायंकाळी खोलीवर कुणीही नव्हते. भिकूकुमार सिंग नंदलाल याने कापडाच्या मदतीने गळफास घेवून आत्महत्या केली. काल सायंकाळी सहकारी मजूर आल्यानंतर हा प्रकार लक्षात आला. घटनास्थळी एमआयडीसी पोलीसांनी धाव घेवून मृतदेहाचा पंचनामा केला. जिल्हा शासकीय वैद्यकीय महाविद्यालयात शवविच्छेदन करण्यात आले असून मृतदेह नातेवाईकांच्या ताब्यात देण्यात आला. या घटनेचा प्राथमिक तपास पोहेकॉ अतुल पाटील हे करीत आहेत.
