रायपूर : वृत्तसंस्था
प्रेमी युगुलात वाद होताच प्रेयसी हायटेन्शन टॉवरवर चढल्याची घटना काही दिवसांपूर्वी घडली. प्रेयसी टॉवरवर चढताच तिची समजूत काढण्यासाठी प्रियकरही तिच्या पाठोपाठ टॉवरवर चढला. छत्तीसगडच्या गौरेला-पेण्ड्रा-मरवाही जिल्ह्यातील या घटनेची सर्वत्र चर्चा झाली. आता या घटनेमागची गोष्ट उघडकीस आली आहे.
जिल्ह्याच्या नेवरी गावात राहणाऱ्या अनिताचा विवाह ६ वर्षांपूर्वी झाला. लग्नानंतर ४ वर्ष सगळे व्यवस्थित सुरू होते. अनिताला एक मूल झाले मात्र त्यानंतर पती-पत्नीमध्ये वाद झाले. त्यानंतर अनिता मुलाला पतीजवळ ठेवून गौरेलातील तिच्या माहेरी परतली. अनिता एका दुकानात काम करू लागली. तिथे तिची ओळख एका तरुणाशी झाली. दोघांमध्ये संवाद सुरू झाला. मैत्रीचे रुपांतर प्रेमात झाले. दोघांना लग्न करायचे होते.
अनिताच्या प्रेम कहाणीत एक नाट्यमय वळण आले. दोघांमध्ये वहिनी-दिराचे नातं असल्याचे त्यांना समजले. अनिताचा प्रियकर तिच्या पतीचा आत्येभाऊ होता. प्रियकर सोडून गेल्यास एकटी पडण्याची भीती तिला वाटत होती. यावरुन दोघांमध्ये सातत्याने वाद होऊ लागले. याच वादातून अनिता आत्महत्या करण्यास हायटेंशन लाईनच्या टॉवरवर चढली.
आमचे एकमेकांवर नितांत प्रेम आहे. आम्हाला एकमेकांपासून वेगळं होण्याची इच्छा नाही. सत्य समोर आल्यानंतर कुटुंबीय आणि ग्रामस्थ आम्हाला वेगळं करतील. मी आधीच विवाहित असल्याने आमची ताटातूट होईल, अशी भीती वाटल्याने टॉवरवर आत्महत्या करण्यासाठी चढले होते, असे अनिताने सांगितले.
संतापाच्या भरात अनिताला ओरडलो त्यामुळे ती नाराज झाली आणि टॉवरवर चढली, असे तिच्या प्रियकराने सांगितले. तिला खाली आणण्यासाठी बऱ्याच मिन्नतवाऱ्या कराव्या लागल्या. खाली उतरल्यानंतर मी टॉवरकडे पाहिले आणि इतक्या उंचीवर कसा चढलो, असा प्रश्न मला पडला. याआधी कधी मी झाडावरही चढलेलो नव्हतो, असे प्रियकर म्हणाला. पोलीस पकडून मारतील या भीतीने पळून गेलो होतो, असे त्याने सांगितले.
