डॉ. शीतल आमटे मृत्यू प्रकरणाच्या चौकशीत एक महत्वाची माहिती पोलिसांना मिळाली आहे. त्यांनी कुत्र्यांसाठी मागवलेले इंजेक्शन टोचून घेऊन आत्महत्या केल्याची शक्यता व्यक्त केली जात आहे. नागपुरातील फार्मासिस्टच्या चौकशीतून ही बाब समोर आली आहे.
नागपूर: महारोगी सेवा समितीच्या सीईओ आणि सामाजिक कार्यकर्त्या डॉ. शीतल आमटे यांच्या आत्महत्या प्रकरणाच्या तपासातून एक महत्वाची माहिती समोर आली आहे. शीतल आमटे यांनी कुत्र्यांसाठी मागवलेले इंजेक्शन वापरून आत्महत्या केल्याची शक्यता व्यक्त केली जात आहे. त्या दिशेने आता पोलीस तपास करण्यात येत आहे.
समाजसेवक दिवंगत बाबा आमटे यांच्या नात आणि महारोगी सेवा समितीच्या सीईओ डॉ. शीतल आमटे-करजगी यांनी ३० नोव्हेंबरला विषारी इंजेक्शन टोचून घेऊन आत्महत्या केली होती. आनंदवनात ही घटना घडल्याने सामाजिक वर्तुळाला जबरदस्त धक्का बसला होता. या प्रकरणी पोलीस तपास करत असतानाच, एक महत्वाची माहिती पोलिसांना मिळाली आहे. डॉ. शीतल यांनी आत्महत्येपूर्वी कुत्र्यांसाठी नागपूरच्या फार्मासिस्टकडून इंजेक्शन मागवली होती, अशी माहिती चौकशीत उघड झाली आहे. फार्मासिस्टकडून एकूण पाच इंजेक्शन मागवले होते, त्यातील एक इंजेक्शन डॉ. शीतल यांच्या मृतदेहाजवळ तुटलेल्या अवस्थेत सापडले होते. पोलिसांनी त्या दिशेने तपास केला. नागपूरमधील ज्या फार्मासिस्टकडून इंजेक्शन मागवले होते, त्याची चौकशी केली. डॉ. शीतल यांनी पाच इंजेक्शन मागवले होते, अशी माहिती फार्मासिस्टने दिल्याचे समजते.
डॉ. शीतल आमटे यांच्याबद्दल जाणून घ्या
डॉ. शीतल आमटे या ज्येष्ठ समाजसेवक दिवंगत बाबा आमटे यांच्या नात आणि विकास व भारती आमटे यांच्या कन्या होत्या. आमटे कुटुंबीयांचा समाजसेवेचा वारसा त्यांनीही पुढे चालवला. जोपासला होता. नागपूरच्या मेडिकल कॉलेजमधून २००३ मध्ये त्यांनी शिक्षण घेतलं. त्यानंतर त्यांनी आनंदवनातच काम करण्याचा निर्णय घेतला होता. शीतल आमटे या अपंगत्व विशेषज्ज्ञ म्हणून प्रसिद्ध होत्या.
आत्महत्येपूर्वी डॉ. शीतल यांनी केले होते गंभीर आरोप
डॉ. शीतल आमटे आत्महत्येपूर्वी काही दिवस आधी सोशल मीडियावर लाइव्ह व्हिडिओ केला होता. त्यात त्यांनी आनंदवानातील महारोगी सेवा समितीच्या कामाबद्दल, विश्वस्त आणि कार्यकर्त्यांबद्दल गंभीर आरोप केले होते. त्यानंतर दोन तासातच व्हिडिओ डिलिटही केला होता. या व्हिडिओनंतर शीतल आमटेंनी केलेले सर्व आरोप आमटे कुटुंबीयांनी फेटाळून लावले होते.
