पाचोरा ः प्रतिनिधी
तालुक्यातील सामनेर येथे पाचोरा जळगाव हायवे रस्त्यावर आज पहाटे ५ : ३० वाजेच्या दरम्यान महात्मा गांधी माध्यमिक विद्यालयाच्या प्रवेशदारासमोर दोन महिला पायी मॉर्निग वॉक करुन परतत असतांना अज्ञात वाहनाने मागून जोरदार धडक दिल्याने दोघी महिला जागीच ठार झाल्याची दुर्घटना घडली आहे. या घटनेमुळे सामनेर गावात हळहळ व्यक्त केली जात आहे.
या घटनेचे सविस्तर वृत्त असे की, पाचोरा तालुक्यातील सामनेर येथील महिला रोज मॉर्निंग वॉकला जात असतात. आज पहाटे साडे पाचच्या सुमारास नेहमीप्रमाणे मॉर्निंग वॉकसाठी सामनेर ते लासगाव दरम्यान रोज पुरुष व महिला सकाळी मॉर्निंग साठी गेले होते. यावेळी सकाळी पाच ते साडे पाचच्या दरम्यान मनिषा साहेबराव पाटील (वय ५० ) व अनिता शहादु पाटील (वय ४८) या दोघी महिला मॉर्निंग वॉक करून परत येत असताना अज्ञात कारने अचानक जोरदार धडक दिली आणि या दोन्ही महिला गंभीर जखमी होऊन जागीच ठार झाल्यात.
ही धडक इतकी भयंकर होती की,धडक देणार्‍या कारने एका महिलेला पन्नास मीटर फरफटत नेले.कारच्या धडकेत दोघी महिला जागीच ठार झाल्या.अपघात एवढा जोरदार होता की, एक महिला रस्त्याच्या बाजूला फेकली गेली तर दुसर्‍या महिलेस ५० मीटर फरफटत नेले. दोघी महिलांना पाचोरा ग्रामीण रुग्णालयात शवविच्छेदन साठी दाखल करण्यात आले. घटनास्थळी पाचोरा पोलीस स्टेशनचे एपीआय राहुल मोरे ,हवालदार रामदास चौधरी पोहचले असून त्यांनी घटनेचा पंचनामा केला. पुढील तपास पोलीस करीत आहे.
