जळगाव ः प्रतिनिधी
जळगाव – पाचारो रोडवर असलेल्या जैन व्हॅली कंपनीजवळ असलेल्या राजपाल नगर येथे महिलेचा आज सकाळी संशयास्पद मृत्यू झाल्याची घटना उघडकीस आली आहे. याप्रकरणी पोलिसांनी पतीला चौकशीसाठी ताब्यात घेतल्याची प्राथमिक माहिती आहे. तर मयत महिलेचा मृतदेह शासकीय वैद्यकिय महाविद्यालयात शवविच्छदेनासाठी पाठविण्यात आला आहे. शवविच्छेदन झाल्यानंतर आलेल्या रिपोर्टमध्ये समजल्यावरच या महिलेचा मारहाणीत खून की पाय घसरून पडल्याचे स्पष्ट होणार आहे.
मिळालेली माहिती अशी की, जळगाव – पाचोरा रस्त्यालगत असलेल्या जैन व्हॅली जवळ असलेल्या राजपाल नगरातील रहिवासी भाऊलाल भिल हे आपल्या परिवारासह वास्तव्यास आहेत. ते त्यांच्या पत्नी या दोघंही जैन व्हॅली येथे मजूरी करून आपल्या कुटूंबातील सहा मुली व एक मुलगा यांचा उदरनिर्वाह करतात. तर दि.20 रोजी सायंकाळी पती व पत्नी दोघही शिरसोली येथे बाजार करुन घरी आल्यानंतर पती भाऊलाल भिल हे दारु पिऊन घरी आले. त्यानंतर महिलेचे सहा मुली व एक मुलगा आपल्या आजीकडे गेले होते. त्यावेळी घरी नबाबाई व भाऊलाल हे दोघेही एकटे होते. त्यानंतर रात्री नबाबाई ह्या स्वयंपाक घरात स्वयंपाक करत असतांना खाली पडल्याने मृत्यू झाला की रात्री पती भाऊलाल हे दारु पिऊन वाद झाल्यानंतर त्यांना मारहाण केल्याने मृत्यू झाला याबाबत अद्याप काहीही समजून आलेले नाही. तर सकाळी 2 वाजेच्या सुमारास भाऊलाल हे उठले असतांना त्यांना स्वयंपाक घरात पत्नी नबाबाई खाली पडलेल्या अवस्थेत आढळून आल्या त्यानंतर त्यांनी परिसरातील रहिवाशांना ही बाब सांगितली. यानंतर पोलिस पाटील श्रीकृष्ण बारी यांनी माहिती मिळाल्यानंतर त्यांनी एमआयडीसी पोलिस स्टेशनला कळविले.
तत्काळ घटनास्थळी पोलिस अधिकारी कुमार चिंथा यांच्यासह एमआयडीसी पोलिस स्थानकाचे पोनि.प्रताप शिकारे, एपीआय अमोल मोरे, पीएसआय दिपक जगदाळे, सहाय्यक फौजदार आनंदसिंग पाटील, अतुल वंजारी यांच्यासह पोलिस पथक याठिकाणी दाखल झाले होते.
