साईमत लाइव्ह मुंबई प्रतिनिधी :
एकनाथ शिंदे मुख्यमंत्री उद्धव ठाकरेंकडून सत्ताच नाही तर शिवसेना आणि पक्षाचे निवडणूक चिन्ह धनुष्य बाणही काढून घेण्याची तयारी करत आहेत. गुवाहाटीमधून शिंदे यांनी कायदे तज्ज्ञांशी चर्चा सुरु केली आहे. यामुळे शिंदे ही आपल्याकडे असलेली खरी शिवसेना आहे, असा दावा करत आहेत. त्याचबरोबर आपल्याला शिवसेनेचे अधिकृत निवडणूक चिन्ह आपल्याला दिले जावे अशी मागणी करणार आहेत. यामुळे ठाकरे यांच्याकडून शिवसेना आणि निवडणूक चिन्ह देखील जाण्याची शक्यता आहे.
कायदे तज्ज्ञ श्रीहरी अणे यांनी एका वृत्त वाहिनीला याबाबतची माहिती दिली. ही कायदेशीर प्रक्रिया आहे, शिंदे यांनी म्हटले म्हणून निवडणूक आयोग लगेच घोषणा करणार नाही. काही कायदेशीर प्रक्रिया आहे, त्यानंतरच हा निर्णय घेतला जाईल. यासाठी सभागृहात दावा करण्याची गरज नाही.
गटनेता बदलण्याची खेळी ते शिवसेनेवर उलटवतील. कारण निवडून आलेल्या आमदारांना बहुमताने गटनेता निवडून देण्याचा अधिकार असतो. शिंदे गट आमचा आघाडी सरकारला पाठिंबा नाही, असे पत्र राज्यपालांना देईल, तेव्हा राज्यपाल हे विद्यमान ठाकरे सरकारला विश्वासदर्शक ठराव मंजूर करण्याचे आदेश देतील. जर मुख्यमंत्र्यांनी राजीनामा न देता विश्वासदर्शक ठरावाला सामोरे गेले तर शिंदेंच्या गटाच्या किमान ३७ आमदारांना सरकारविरोधात मतदान करावे लागेल. जर कमी आमदारांनी सरकारविरोधात मतदान केले तर शिवसेना पक्षांतरबंदी कायद्यानुसार शिंदे गटाच्या आमदारांचे सदस्यत्व रद्द करण्याची मागणी करतील. त्यामुळे जोपर्यंत शिंदे यांच्या गटात शिवसेनेचे ३७ आमदार येत नाहीत, तोपर्यंत त्यांचे पत्र राज्यपालांकडे पाठविणार नाहीत, असे तज्ञांचे मत आहे.
