मुंबई : प्रतिनिधी
शिवसेनेचे उपनेते आणि मुंबई महानगरपालिकेतील स्थायी समितीचे अध्यक्ष यशवंत जाधव ( Yashwant Jadhav) यांच्यावर धाड टाकल्यानंतर आयकर खात्याने त्यांना आणखी एक दणका दिला. त्यांच्या ४१ संपत्ती जप्त केल्या. यात जाधव यांचा वांद्रयातील पाच कोटींचा फ्लॅटचा समावेश आहे. आयकर खात्याने २५ फेब्रुवारीला जाधव यांच्या माजगाव येथील निवासस्थानी धाड टाकली होती. तेव्हापासून तपासादरम्यान यशवंत जाधव यांच्या अनेक संपत्तींवर टाच आली आहे.
२०१८ ते २००२ दरम्यान स्थायी समिती अध्यक्ष असताना यशवंत जाधव यांनी बेकायदा मार्गाने मिळवलेल्या पैशांच्या माध्यमातून ही संपत्ती खरेदी केली असावी असा आयकर विभागाला संशय आहे.
आयकर विभागाने यशवंत जाधव यांचे मेहुणा विलाश मोहिते आणि पुतण्या विनीत जाधव यांनाही जबाब नोंदवण्यासाठी बोलावले आहे. हे दोघेही यशवंत जाधवांचे आणि त्यांच्या कंपनीचे आर्थिक व्यवहार सांभाळत होते. विलाश मोहिते आणि यशवंत जाधव यांचे पालिकेशी संबंधित आर्थिक व्यवहार पाहत असताना विनीत Newshawk Multimedia Pvt Ltd. कंपनीत वादग्रस्त व्यावसायिक बिमल अग्रवाल यांच्यासोबत संचालक होता.
यशवंत जाधव यांनी भायखळामधील बिलाकडी चेंबर्समधील (पगडी सिस्टम असणारी इमारत) ३१ फ्लॅट्सचे भाडेकरु हक्क विकत घेतले होते. Newshawk Multimedia Pvt Ltd. कंपनीच्या नावे या भाडेकरुंना थेट रोख रक्कम देण्यात आली होती.
जप्त करण्यात आलेल्या फ्लॅटपैकी २६ कंपनी (Newshawk Multimedia Pvt Ltd)च्या नावे नोंदले आहेत. याशिवाय, भायखळामधील ‘इम्पिरियल क्राउन हॉटेल’ यशवंत जाधव यांनी सासूच्या नावे खरेदी केले होते.
