बोदवड तालुक्यात गतिमंद तरुणीवर बलात्कार

बोदवड : प्रतिनिधी
तालुक्यातील एका गावात २६ वर्षीय गतीमंद तरुणीवर त्याच गावातील तरुणाने बलात्कार केल्याचा प्रकार उघडकीस आला आहे. याप्रकरणी बोदवड पोलीसात गुन्हा दाखल करण्यात आला असून परिसरात घडल्या प्रकाराने संताप व्यक्त केला जात आहे.
याबाबत माहिती अशी की, तालुक्यातील एका गावात २६ वर्षीय तरुणी गतीमंद असून ती आईवडिलांसोबत रहिवासाला आहे. गतीमंदपणा असल्याने तरुणी वेडसरपणा करते. या कारणामुळे तिच्या वडिलांनी तिला आपल्या घराच्या बाहेर ओट्यावर खाटेला दोरीने बांधून ठेवले होते. २६ डिसेंबर रोजी दुपारच्या वेळेस पिडीत तरुणीच्या घरात कुणीही नसतांना त्याच गावातील एका तरुणाने तरुणीच्या वेडसरपणाचा गैरफायदा घेवून तिच्यावर बलात्कार केला. सदर प्रकार ३१ डिसेंबर रोजी सायंकाळी पिडीत तरुणीच्या आईवडिलांना समजला. तसेच सदर संतापजनक प्रकार गावातीलच राजु सुकदेव वाघ याने केला असल्याचेही त्यांना समजले. याप्रकरणी त्यांनी बोदवड पोलीसात जात घडलेला प्रकार कथन करून पिडीतच्या आईच्या फिर्यादीवरून राजु सुकदेव वाघ या तरुणाविरुध्द बलात्काराचा गुन्हा दाखल करण्यात आला असून पुढील तपास पोउनि भाईदास मालचे हे करीत आहेत. दरम्यान, संशयीत आरोपी राजु वाघ हा फरार झाला असून पिडीतेस आज वैद्यकीय तपासणीसाठी जिल्हा सामान्य रुग्णालयात पाठविण्यात आले असल्याचे तपासी अधिकारी पोउनि मालचे यांनी ‘साईमत’शी बोलतांना सांगितले.