जळगाव ः प्रतिनिधी
महाराष्ट्र नवनिर्माण सेनेचे अध्यक्ष राज ठाकरे यांनी 3 मे रोजीचा अल्टीमेट दिल्यानंतर जळगाव शहरात याचे पडसाद आज सकाळी 6 वाजेच्या सुमारास उमटले आहे. मनसे पदाधिकाऱ्यांनी याठिकाणी शनिमंदिरात महाआरती करुन हनुमान चालीसा भोंग्यावर लावून पठन केले आहे.
सविस्तर वृत्त असे की, शहरातील महाराष्ट्र नवनिर्माण सेनेच्या काही पदाधिकाऱ्यांनी आज सकाळी 6 वा. शनिपेठेतील शनिमंदिरात एकत्र येवून हनुमान चालीसा पठन करून मनसे अध्यक्ष राज ठाकरे यांच्या आदेशाचे पालन केले आहे. यामध्ये मनसे जळगाव महानगराध्यक्ष विनोद शिंदे, महानगर उपाध्यक्ष आशिष सपकाळे यांच्यासह कार्यकर्ते उपस्थित होते. तसेच यावेळी शनिपेठ पोलिस स्थानकाच्या पोलिस अधिकारी व कर्मचाऱ्यांचाही बंदोबस्त तैनात करण्यात आला होता.