दिल्ली : देशातील दुसरी सर्वात मोठी आयटी कंपनी ‘इन्फोसिस’ (Infosys) ने बुधवारी रशियामधील व्यवसाय बंद करण्याचा निर्णय घेतला. रशियाने युक्रेनविरोधात युद्ध पुकारल्यानंतर, जगभरामधील अनेक बड्या कंपन्यांनी रशियाच्या निषेधात थेतील काम बंद केले आहे. यामध्ये वाहन क्षेत्रातील कंपन्यांसोबत माहिती तंत्रज्ञान (आयटी) क्षेत्रातील कंपन्यांचाही समावेश आहे.
रशियाने २४ फेब्रुवारी रोजी युक्रेनवर हल्ला चढवला. त्यानंतर शेकडो परदेशी कंपन्यांनी या हल्ल्याचा निषेध करण्यासाठी आपला रशियामधील उद्योग पूर्णपणे बंद करुन गाशा गुंडाळला. गुंतवणूकदार आणि ग्राहकांकडून असणाऱ्या दबावामुळे पाश्चिमात्य देशांमधील अनेक कम्पन्यायांना हा निर्णय घ्यावा लागला.
माहिती तंत्रज्ञान क्षेत्रातील सॅप आणि ओरॅकल या दोन मोठ्या कंपन्यांनी रशियामधील व्यवसाय आधीच बंद केला आहे. युक्रेनचे उपराष्ट्राध्यक्ष मखायलो फेड्रोव्ह यांनी या कंपन्याकडे विनंती केल्यानंतर कंपन्यांनी सकारात्मक प्रतिसाद दिला. युक्रेनच्या उप पंतप्रधानांनी या दोन्ही कंपन्यांना लिहिलेली पत्र ट्विटरवरुन पोस्ट केली होती.
रशियामधून बाहेर पडण्याच्या निर्णयाबाबत इन्फोसिसचे मुख्य कार्यकारी अधिकारी आणि व्यवस्थापकीय संचालक सलील पारेख म्हणालेत “आम्हाला आजच्या घडीला रशियन क्लायंटसोबत कोणत्याच डील्स करायच्या नाहीत. तसेच, पुढेही त्यांच्यासोबत व्यापार करण्याचा आमचा विचार नाही.” इन्फोसिसची स्थापना १९८१ रोजी सात जणांनी केली होती. त्यामध्ये नारायण मुर्तींचाही समावेश होता.
इन्फोसिसने बुधवारी टीसीएसपाठोपाठ चौथ्या तिमाहीत ५,६८६ कोटी रुपयांच्या निव्वळ नफ्याची नोंद केली. वार्षिक आधारावर कंपनीच्या नफ्यात १२ टक्के वाढ झाली आहे. बेंगळूरु येथे मुख्यालय असलेल्या इन्फोसिसने गेल्या वर्षी याच काळात ५,०७६ कोटी रुपयांचा करपश्चात नफा नोंदविला होता. मात्र, गेल्या तिमाहीच्या तुलनेत सरलेल्या मार्च तिमाहीत निव्वळ नफ्यात २ टक्क्यांची घसरण झाली आहे. गेल्या तिमाहीत कंपनीने ५,८०९ कोटी रुपयांचा निव्वळ नफा कमावला होता.
कंपनीने जानेवारी ते मार्च २०२२ या चौथ्या तिमाहीत ३२,२७६ कोटी रुपयांचा महसूल मिळविला आहे. वार्षिक तुलनेत त्यात २३ टक्क्यांची वाढ झाली आहे, मात्र ऑक्टोबर ते डिसेंबर २०२१ तिमाहीशी तुलना करता त्यात एक टक्क्याची घसरण झाली आहे. या तिमाहीत ३१,८६७ कोटींच्या महसुलाची कंपनीने नोंद केली होती. तर जानेवारी-मार्च २०२१ तिमाहीत कंपनीने २६,३११ कोटी रुपयांचा एकत्रित महसूल मिळविला होता.
सरलेल्या २०२१-२२ या संपूर्ण आर्थिक वर्षांत इन्फोसिसने २२,११० कोटींचा निव्वळ नफा कमावला आहे. जो त्या आधीच्या वर्षांच्या तुलनेत १४ टक्क्यांनी अधिक राहिला आहे. एप्रिल-मार्च २०२१ या कालावधीत कंपनीने वर्षभरात १९,३५१ कोटींचा नफा मिळविला होता. तर महसुलाच्या आघाडीवर २१ टक्क्यांची वाढ नोंदवत १,२१,६४१ कोटी रुपयांची महसूल प्राप्ती केली आहे. आधीच्या आर्थिक वर्षांत कंपनीने १,००,४७२ कोटी रुपयांचा महसूल मिळविला होता. कंपनीच्या संचालक मंडळाने भागधारकांना खूश करताना, पाच रुपये दर्शनी मूल्य असलेल्या प्रत्येक समभागासाठी १६ रुपये अंतिम लाभांश जाहीर केला आहे.
