साईमत, प्रतिनिधी, जळगाव
राष्ट्रवादी काँग्रेसमध्ये उभी फूट पडल्यानंतर शरद पवार यांनी राज्याचा दौरा करण्याचे जाहीर केले होते. या अनुषंगाने ते जळगाव जिल्ह्यात येणार होते. त्यांच्या मुक्ताईनगर, पारोळा आणि धरणगाव या तीन ठिकाणी सभांचे नियोजन देखील करण्यात आले होते. मात्र मध्यंतरी झालेल्या अतिवृष्टीमुळे त्यांचा दौरा रद्द करण्यात आला होता.
दरम्यान, आज शरद पवार हे पळासखेडा येथे दिवंगत कविवर्य ना. धो. महानोर यांच्या कुटुंबाचे सांत्वन करण्यासाठी आले असता त्यांनी जिल्ह्यातील नेत्यांशी चर्चा केली. याबाबत आमदार एकनाथराव खडसे यांच्या जळगावातील निवासस्थानी बैठक घेण्यात आली. यात शरद पवार हे दि. 4 सप्टेंबर रोजी जिल्हा दौऱ्यावर येणार आहेत. त्यांची शहरातील सभा सागर पार्क मैदानावर आयोजीत करण्यात आली आहे. तसेच, या सभेच्या नियोजनाबाबत दि.22 ऑगस्ट रोजी दुपारी राष्ट्रवादीच्या जिल्हा कार्यालयात बैठक घेण्यात येणार असल्याचेही याप्रसंगी सांगण्यात आले.
