पुणेः करोनाचा अहवाल पॉझिटिव्ह आल्यानंतर कोविड सेंटरमध्ये उपचार घेणाऱ्या रुग्णांच्या दागिन्यांवर डल्ला मारल्याचा प्रकार उघडकीस आला आहे. पुण्यातील बाणेर कोविड सेंटरमध्ये हा धक्कादायक प्रकार उघडकीस आला आहे. याआधीही राज्यातील काही कोविड सेंटरमध्ये असे प्रकार घडले होते.
बाणेर येथील कोविड हॉस्पिटलमध्ये रूग्ण व मृत्यू झालेल्या रूग्णांच्या अंगावरील दागिने चोरून नेल्याचा प्रकार समोर आला आहे. याप्रकरणी चतु:शुंगी पोलिस ठाण्यात गुन्हा दाखल करून दोन कर्मचा-यांना अटक करण्यात आली आहे. शारदा अंबिलढगे आणि अनिल तुकाराम संगमे अशी अटक केलेल्यांची नावे आहेत.
बाणेर येथील कोविड हॉस्पिटलमध्ये हे दोन कर्मचारी कामाला होते. हॉस्पिटलमध्ये उपचारांसाठी आलेले रुग्ण व करोनामुळं मृत्यू झालेल्या रुग्णांच्या अंगावरील दागिने हे दोन कर्मचाऱ्यांनी सापळा रचून लंपास करत होते. सीसीटीव्ही फुटेजच्या माध्यमातून त्यांनी रुग्णाच्या अंगावरील दागिने चोरल्याचा प्रकार उघडकीस आला. याप्रकरणी तक्रार दिल्यानंतर दोघांना अटक करण्यात आली आहे.
दरम्यान, पुणे शहरात शुक्रवारी ५७३ नवीन रुग्णांची नोंद झाली. ९९९ जणांनी करोनावर मात केली. शहरात सात हजार ५३५ सक्रिय रुग्ण आहेत. नवीन रुग्णांपेक्षा बरे होणाऱ्या रुग्णांची संख्या अधिक, नवीन रुग्णांची संख्या तीन आकडी आणि मृत्यूदरही कमी, या स्थितीत सातत्य असल्याने शहरातील करोनाचा संसर्ग आटोक्यात येऊ लागल्याचे चित्र आहे.
