कमी गुण मिळाल्याने पाचोऱ्यात तरुणाची आत्महत्या
पाचोरा (प्रतिनिधी)-
आज बारावीच्या निकालात अपेक्षेपेक्षा कमी गुण मिळाल्याने नैराश्यातून १९ वर्षीय तरुणाने पाचोऱ्यातील बहिणीच्या घरात गळफास लावून आत्महत्या केली पाचोरा पोलिस स्टेशनमध्ये अकस्मात मृत्यूची नोंद करण्यात आली.
भावेश प्रकाश महाजन (वय – १९ वर्ष, रा. एरंडोल) हा विद्यार्थी एरंडोल येथे महाविद्यालयीन शिक्षण घेत होता. १२ वीची भावेश याने एरंडोल येथे परीक्षा दिली होती. परीक्षा दिल्यानंतर भावेश १५ दिवसांपासून पाचोरा येथील भडगाव रोडवरील राजीव गांधी कॉलनीत (शक्तीधाम जवळ) राहत असलेल्या बहिणीकडे आला होता. ४ मेरोजी सायंकाळी भावेशची बहिण व पाहुणे पुणे येथे लग्न समारंभासाठी गेले होते. भावेश ५ मेरोजी सकाळी १० वाजता पाचोरा शहरातील रेल्वेस्थानक रोडवरील दुसऱ्या पाहुण्यांच्या दुकानावर गेला होता. दुपारी भावेश दुकान बंद करुन राजीव गांधी काॅलनी येथील बहिणीच्या घरी गेला. दुपारी १२ वीचा आॅनलाईन निकाल जाहीर झाला. यात भावेश यास ४२ टक्के गुण मिळाले. भावेशने नैराश्यातून बहिणीच्या राहत्या घरात गळफास घेत जीवनयात्रा संपवली.
दुसरीकडे शहरातच वास्तव्यास असलेल्या दुसऱ्या बहिणीकडून भावेश यास जेवणाचा डब्बा येत होता. डब्ब्यासाठी बहिण भावेश यास फोन करीत होती. मात्र भावेश फोन उचलत नव्हता. अखेर पाहुण्यांनी शेजारी मित्राला घरी जाऊन चौकशी करण्यास सांगितले त्यावेळी ही घटना समोर आली.
पोलिसांनी घटनास्थळाचा पंचनामा करून मृतदेह रुग्णवाहिका चालक संजय पाटील यांच्या मदतीने पाचोरा ग्रामीण रुग्णालयात दाखल केला.
