पत्नीची हत्या; वेल्हाळा शिवारातून पती फरार
भुसावळ (प्रतिनिधी)-
तालुक्यातील वेल्हाळा शिवारात दारूच्या नशेत पतीने पत्नीची गळा आवळून हत्या केल्याची घटना उघडकीस आली आहे. ही घटना २३ मार्चरोजी पहाटे समोर आली असून संशयित आरोपी पती अजीज सलीम शेख (वय ३३) हा घटनास्थळावरून पसार झाला आहे.
विल्हाळा शिवारातील गट क्र. ६५१ मध्ये किशोर पाटील (रा. सुसरी) यांच्या मालकीच्या विटभट्टीवर परळी वैजनाथ ( जि. बीड) येथील नियाजउद्दीन शेख मन्सूर कुटुंबासह कामासाठी आले. त्यांच्यासोबत मुलगी सना आणि जावई अजीज हे चार मुलांसह विटा तयार करण्याचे काम करीत होते. सर्व कुटुंब एकाच परिसरात पत्र्याच्या खोल्यांमध्ये राहत होते. अजीज याला दारूचे व्यसन असल्याने तो रोज रात्री पत्नीशी भांडण करीत असे. शनिवारी रात्रीही दारूच्या नशेत तो घरी आल्यावर पत्नी सना (वय २५)ला शिवीगाळ करू लागला. शेजारी राहणाऱ्या सासूने त्याला शांत करण्याचा प्रयत्न केला. जेवणाचा आग्रह केल्यानंतर अजीज व सना मुलांसह खोलीत झोपायला गेले.
रविवारी पहाटे कामासाठी उठवायला गेल्यानंतर खोलीतून प्रतिसाद मिळाला नाही. दरवाजा उघडताच सासू आणि इतर मजुरांनी पाहिले तेव्हा सना रक्तबंबाळ अवस्थेत मृत पडल्याचे आढळले. तिच्या डोळ्यातून आणि नाकातून रक्त येत होते गळ्यावर व्रण असल्याने गळा आवळल्याचा संशय व्यक्त केला जात आहे. सना शेख हिचा मृत्यू नेमका कशामुळे झाला याबाबत अद्याप स्पष्टता नाही. मात्र, गळा दाबल्याचा संशय असल्याने शवविच्छेदन अहवालानंतर हत्या कशी घडली याचा उलगडा होईल, असे पोलिसांनी सांगितले.
घटनेनंतर पती अजीज फरार झाला असून त्याच्यावरच पत्नीच्या हत्येचा संशय व्यक्त होत आहे. मृत सना हिचा भाऊ अजहर शेख मन्सूरच्या तक्रारीवरून वरणगाव पोलीस ठाण्यात अजीज शेख याच्याविरोधात खुनाचा गुन्हा दाखल करण्यात आला आहे.
घटनेची माहिती मिळताच सपोनि जनार्धन खंडेराव, पो.कॉ. सुकराम सावकारे, मनोहर बनसोडे, भुषण माळी, साहेबराव कोळी यांनी घटनास्थळी पंचनामा केला. अजीज शेख याला अटक करण्यासाठी पोलीस पथके शोधमोहीम राबवत आहेत.
