११ लाखांच्या गांजासह दोन आरोपी पकडले
अमळनेर ( प्रतिनिधी)-
अमळनेर पोलिसांनी जळोद रस्त्यावर छापा टाकून ५६ किलो ९७० ग्रॅम वजनाचा गांजा पकडला. या कारवाईत दोन आरोपींना अटक करण्यात आली वाहनासह १९ लाख ३९ हजार रुपयांचा मुद्देमाल जप्त करण्यात आला आहे. अमळनेर पोलीस ठाण्यात गुन्हा दाखल करण्यात आला आहे.
पोलिसांना मिळालेल्या गोपनीय माहितीनुसार, पांढऱ्या बोलेरो पिकअप (एमएच १८ एजे ०२२३) मधून गांजा विक्रीसाठी येणार असल्याचे समजले. पोलिस निरीक्षक दत्तात्रय निकम यांच्या मार्गदर्शनाखालीआणि तहसीलदार रुपेशकुमार सुराणा यांच्या उपस्थितीत छापा टाकण्यात आला.
२८ मार्चरोजी रात्री पोलिसांनी जळोद रस्त्यावर उड्डाणपुलाजवळ गाडी अडवली. गाडीच्या झडतीत १८ पॅकेटमध्ये भरलेला ओलसर गांजा सापडला. ५६ किलो ९७० ग्रॅम वजन असलेल्या गांजाची किंमत ११.३९ लाख रुपये आहे.
मनोज सोनू पावरा (२४, महादेव सोनपाडा, ता. शिरपूर) आणि सीताराम वेळू सोनवणे (वय ५२, वलवाडी, जि. बडवाणी, मध्यप्रदेश) यांना अटक करण्यात आली. गांजा आणि ८ लाख रुपये किमतीची बोलेरो गाडी असा १९.३९ लाख रुपयांचा मुद्देमाल पोलिसांनी जप्त केला आहे. दोघांवर गुन्हा दाखल करण्यात आला असून, तपास पोलीस निरीक्षक नामदेव बोरकर करत आहेत.
