१२ लाख ७५ हजारांच्या बोगस कापूस बियाण्यांचा साठा जप्त
चोपडा ( प्रतिनिधी)
तालुक्यातील तावसे बुद्रुक शिवारात २ मेरोजी दुपारी शेतात आंब्याच्या झाडाखाली लपवून ठेवलेले १२ लाख ७५ हजार रुपये किंमतीचे बोगस कापसाचे बियाणे आढळल्याने व दहा दिवसांतील ही दुसरी मोठी कारवाई असल्यामुळे कृषी विभागात खळबळ उडाली आहे. जीवनलाल चौधरी असे या शेतकऱ्याचे नाव असून, चोपडा ग्रामीण पोलीस ठाण्यात गुन्हा दाखल करण्यात आला आहे.
कृषी विभागाला तावसे बुद्रुक शिवारात बोगस बियाण्यांचा साठा असल्याची गुप्त माहिती मिळाली होती. कृषी विभागाने कारवाई करत जीवनलाल चौधरी यांच्या शेतातील आंब्याच्या झाडाखाली झाकून ठेवलेला १२ लाख ७५ हजार रुपये किंमतीचा बोगस कापसाचा साठा जप्त केला. या कारवाईमुळे बोगस बियाणे विक्री करणाऱ्यांच्या नेटवर्कचा पर्दाफाश होण्याची शक्यता आहे.
यामुळे शेतकऱ्यांमध्ये भीतीचे वातावरण आहे. यापूर्वीही चोपडा तालुक्यात बोगस बियाणे जप्त करण्यात आले होते. शेतकऱ्यांनी अधिकृत कृषी केंद्रातूनच परवाना आणि पक्क्या बिलासह बियाणे खरेदी करावे, असे आवाहन कृषी विभागाने केले आहे. अज्ञात व्यक्तींकडून किंवा घरोघरी फिरून विकणाऱ्यांकडून बियाणे खरेदी करू नये, असेही कृषी विभागाने स्पष्ट केले आहे.
