‘बदन पे सितारे लपेटे हुए…’ ; मंत्री सावकारेंच्या मनात नेमके कोण?
जळगाव (प्रतिनिधी)-
राजकारणाचा व्याप सांभाळून खास गाणे म्हणण्याचा छंद वस्त्रोद्योग मंत्री संजय सावकारे यांनीही जोपासला आहे. संधी मिळेल तेव्हा पदाचा बडेजाव न मिरवता सहजपणे गाणाऱ्या मंत्री सावकारे यांनी रविवारी भुसावळमध्ये कार्यक्रमात ‘बदन पे सितारे लपेटे हुए…’ हे गाणे गायिले. या गाण्यानंतर मंत्री सावकारे यांच्या मनातील ती कोण, अशी चर्चा उपस्थितांमध्ये रंगली.
भुसावळमधील स्नेहयात्री प्रतिष्ठानकडून स्नेहयात्री करंडक राज्यस्तरीय एकांकिका स्पर्धेचे आयोजन केले जाते. यंदा समारोपप्रसंगी उपस्थित मंत्री संजय सावकारे यांना गाणे म्हणण्याचा आग्रह झाला. तेव्हा फार आढेवेढे न घेता कराओकेच्या मदतीने त्यांनी ‘बदन पे सितारे लपेटे हुए…’ हे शम्मी कपूर यांच्यावर चित्रीत झालेले मोहंमद रफी यांच्या आवाजातील गाणे सादर करून रंगत वाढवली. गाणे गाताना त्यांनी धरलेला हळूवार ठेकाही सर्वांचे लक्ष वेधून घेत होता. त्यांच्यातील गायकीला आणि साधेपणाला सर्वांनी दिली.
ना. सावकारे विधानसभेच्या भुसावळ मतदारसंघातून २००९ पासून अनुसूचित जाती राखीव जागेवर निवडून येत आहेत. २०१३ मध्ये त्यांना पहिल्यांदा मंत्रीपदाची संधी मिळाली होती. नंतर त्यांनी २०१४ मध्ये भाजपमध्ये प्रवेश केला. महायुतीच्या नवीन सरकारमध्ये वस्त्रोद्योग मंत्री असलेल्या सावकारे यांनी मेकॅनिकल पदविका घेतली आहे. व्यस्त दिनचर्चा सांभाळून गाण्याची आवड जोपासण्यावर त्यांनी भर दिला आहे. भुसावळ शहरातील हौशी गायकांनी मिळून तयार केलेल्या कराओके गटात ते सहभागी आहेत.
