मुलाला वाचवण्याच्या प्रयत्नात आई, मावशीचाही बुडून मृत्यू
यावल (प्रतिनिधी)-
तालुक्यातील अंजाळे येथे तापी नदीपात्रात बुडणाऱ्या मुलाला वाचवण्याच्या प्रयत्नात त्याची आई व मावशी यांच्यासह तीन जण बुडून मरण पावल्याची हृदयद्रावक घटना घडल्याने परिसरावर शोककळा पसरली आहे.
अंजाळे येथील घाणेकरनगरात बादल भील हा तेवीस वर्षाचा युवक वास्तव्याला असून तो जेसीबी ऑपरेटर म्हणून काम करतो. काल खंडोबाचा जागरण गोंधळ असल्याने त्यांच्या बहिणींसह आप्त आलेले होते. त्यांची मावस बहिण वैशाली भील ( रा. अंतुर्ली, ता. अमळनेर ) आणि मामेबहिण सपना सोनवणे (रा. पळाशी, ता. सोयगाव ) यांचा समावेश होता. काल जागरण गोंधळ झाल्यानंतर दुपारी ते तापी नदीवर आंघोळीसह कपडे धुण्यासाठी गेले. वैशाली भील यांचा मुलगा नकुल ( वय वर्षे पाच ) अचानक पाय घसरून पाण्यात पडल्याने गटांगळ्या खाऊन बुडू लागला. त्याला वाचवण्यासाठी आई वैशाली भील आणि मावशी सपना सोनवणे यांनी उडी घेतली. या दोन्ही जणींनादेखील पोहता येत नसल्याने हे तिन्ही जण पाण्यात बुडाले.
त्यांच्यासोबत नदीवर गेलेल्या अनु सतीश भील या बालिकेने घरी धावत येऊन याची माहिती दिली. यानंतर पोहणाऱ्यांनी त्यांचा शोध घेऊन त्यांना पाण्याबाहेर काढले. मात्र तोवर त्यांचा मृत्यू झाला होता. तिघांचा मृत्यू झाल्याने अंजाळे गावावर शोककळा पसरली आहे. यावल पोलीस स्थानकात नोंद करण्यात आली आहे.
