सोलापूर जिल्ह्यात भूकंपाचे सौम्य धक्के
मुंबई (प्रतिनिधी)-
सोलापूर जिल्ह्यातील पंढरपूर, सांगोला आणि मंगळवेढा या तीन ठिकाणी आज भूकंपाचे सौम्य धक्के जाणवले आहेत. सकाळी ११ वाजून २२ मिनिटांनी भूकंपाचे हे सौम्य धक्के बसले असून याची माहिती राष्ट्रीय भूकंपशास्त्र केंद्राने ट्विटरवर दिली आहे. सोलापूरसह जिल्ह्यातील नागरिकांमध्ये काहीशी भीती पसरली आहे.
या भूकंपाची तीव्रता २.६ रिश्टर स्केल नोंदवण्यात आली आहे. या भूकंपाचं केंद्र जमिनीपासून ५ किमी खाली होते. सांगोला येथे भूकंपाचा केंद्रबिंदू आहे. सुदैवाने या भूकंपामुळे कोणतीही हानी झालेली नाही.
याआधी मंगळवारी भारतातील पूर्व भागातील कोलकाता, इंफाल येथे भूकंपाचे धक्के जाणवले होते. २८ मार्चरोजी नेपाळला आलेल्या भूकंपाचे धक्के बिहारच्या सिलीगुडी आणि आसपासच्या परिसरात बसले होते. २ एप्रिल रोजी सिक्किमच्या नामची येथे आणि १ एप्रिलला लेह लडाखमध्येही भूकंपाचे धक्के बसले आहेत.
३१ मार्च रोजी अरुणाचल प्रदेशातील तवांग, शी योमी, सिक्किममधील गंगटोकमध्येही जमिनीला हादरे बसले होते. २९ मार्च रोजी हरियाणाच्या सोनीपत येथे दुपारी २ वाजून ८ मिनिटांनी २.३ रिश्टर स्केल भूकंपाने जमीन हादरली होती.
