वैद्यकीय अधिकारी तरुणीची छेड
जळगाव (प्रतिनिधी)-
रस्त्यावरून जाणाऱ्या मुलींची रोडरोमिओंकडून छेड काढल्याचा प्रकार जळगाव तालुक्यात घडला. वैद्यकीय अधिकारी असलेल्या तरुणीचा पाठलाग करत तिला इशारे करून छेडखानी काढल्याने पोलिसात तक्रार दाखल केली आहे.
जळगाव तालुक्यातील एका गावात शासकीय रुग्णालयात तरुणी वैद्यकीय अधिकारी आहे. तरुणी नोकरीला असलेल्या रुग्णालयात जाऊन तसेच रस्त्याने येता- जाताना तिचा सातत्याने पाठलाग करत त्रास दिला जात होता. या तरुणाने तरुणीला तिचा फोन नंबर मागितला. तसेच तू माझ्याशी फोनवर बोल असे म्हणत तिची छेड काढल्याचा प्रकार समोर आला आहे.
रोज होत असलेल्या प्रकाराला कंटाळून तरुणीने अखेर पोलिसात धाव घेतली. छेड काढणाऱ्या तरुणाविरोधात पोलिसात तक्रार दिली असून नशिराबाद पोलिस ठाण्यात गुन्हा दाखल करण्यात आला आहे. यात रस्त्याने येताना जाताना सुद्धा वैद्यकीय अधिकारी असलेल्या तरुणीचा पाठलाग करत तरुणाने तिची छेड काढली. मनाला लज्जा उत्पन्न होईल असे प्रयत्न केले असे तक्रारीत नमूद आहे.
