जनार्दन बंगाळे यांचा राज्यस्तरीय गौरव
जळगाव ( प्रतिनिधी ) –
राजीव गांधी प्रशासकीय गतिमानता अभियान 2023-24 अंतर्गत रावेर तालुक्यातील खिरोदा प्र. येथील मंडळ अधिकारी जनार्दन दत्तात्रय बंगाळे यांना ‘दाखल्यांची शाळा’ या नाविन्यपूर्ण उपक्रमाच्या यशस्वी अंमलबजावणीबद्दल राज्यस्तरीय पुरस्काराने सन्मानित करण्यात आले.
मुंबई येथे पार पडलेल्या समारंभात मुख्यमंत्री देवेंद्र फडणवीस यांच्या हस्ते हा गौरव प्रदान करण्यात आला. यावेळी कौशल्य विकास मंत्री मंगलप्रभात लोढा तसेच राज्याच्या मुख्य सचिव सुजाता सौनिक यांची उपस्थिती होती.
“दाखल्यांची शाळा” ही संकल्पना ग्रामीण भागातील नागरिकांना विविध शासकीय दाखले सुलभ, पारदर्शक आणि वेळेत मिळावेत यासाठी राबविण्यात आली. या उपक्रमामुळे शासकीय कार्यालयांची प्रतिमा जनमानसात सकारात्मक झाली नागरिकांचा प्रशासनावरचा विश्वास अधिक दृढ झाला आहे.
ग्रामीण भागात नवकल्पनांद्वारे परिवर्तन घडवणाऱ्या जनार्दन बंगाळे यांच्या कार्याचे कौतुक होत आहे. त्यांच्या या यशाबद्दल जिल्हा प्रशासनाकडून त्यांचे अभिनंदन करण्यात आले.
