६ दरोडेखोरांची टोळी फरार : एकाला अटक
मुक्ताईनगर (प्रतिनिधी)-
येथील लालगोटा-धुळे रस्त्यावर दरोडा टाकण्याच्या उद्देशाने आलेल्या ७ जणांच्या टोळीतील एकाला पकडण्यात यंत्रणेला यश आले अन्य सहा संशयित पसार झाले आहेत. मुक्ताईनगर पोलिसात गुन्हा दाखल करण्यात आला आहे.
परराज्यातील लोकांना पिवळ्या रंगाचा धातू देण्याच्या बहाण्याने बोलावून दरोडा टाकण्याच्या उद्देशाने धुळे लालगोटा शेताकडे जाणाऱ्या कच्च्या रस्त्यावर पुलाजवळ तयारीत असलेल्या आरोपींबाबत माहिती मिळताच पथकाने २७ रोजी धाव घेतली. मात्र ६ संशयित पसार होण्यात यशस्वी झाले एकास पकडण्यात यश आले.
राहुल हरी राठोड (वय ३०, रा.जोंधनखेडा) असे पकडलेल्या आरोपीचे नाव आहे. कॉ सागर सावे यांच्या फिर्यादीवरून राहुल राठोड, गोपी राठोड, दिनेश राठोड, गजानन राठोड, रोहित साळुंखे (सर्व रा.जोंधनखेडा) व इतर दोन अशा ७ आरोपींविरुद्ध मुक्ताईनगर पोलिसात गुन्हा दाखल करण्यात आला.
आरोपींकडून ३० हजार रुपये किंमतीची नंबर नसलेली ज्युपिटर कंपनीची दुचाकी, ३५ हजार रुपये किंमतीची होंडा शाईन, २० हजार रुपये किंमतीची नंबर नसलेली दुचाकी, पिवळ्या धातूचा तुकडा व त्यावर फाईन गोल्ड लिहिलेले, लोखंडी चाकू, दोरी व टेप असे साहित्य जप्त करण्यात आले. ही कारवाई संतोष चौधरी, प्रदीप इंगळे, हरीश गवळी, सागर सावे आदींच्या पथकाने केली. स पो नि जयेश पाटील तपास करीत आहेत.
