धावत्या बसच्या चालकाला अर्धांगवायूचा
झटका ; उपचारादरम्यान मृत्यू
यावल ( प्रतिनिधी)
येथील आगारातून भुसावळकडे बस घेऊन जात असताना ५८ वर्षीय एसटी बसचालकाला अंजाळे गावाजवळ अचानक अर्धांगवायूचा तीव्र झटका आला. प्रसंगावधान राखत त्यांनी बस थांबवली. नागरिकांनी तातडीने त्यांना भुसावळ आणि नंतर जळगाव येथील खाजगी रुग्णालयात हलवले. मात्र, उपचारादरम्यान त्यांचा मृत्यू झाला.
चालक शालिक पाटील-बारी (वय ५८, रा. जुना भाजी बाजार, बारी वाडा, यावल) हे यावल एसटी आगारातून भुसावळकडे बस घेऊन निघाले होते. अंजाळे जवळ अचानक त्यांना अर्धांगवायूचा झटका आला. प्रसंगावधान राखत त्यांनी बस थांबवली. स्थानिक नागरिकांनी त्यांना उपचारासाठी हलवले. मात्र, उपचारादरम्यान त्यांचा मृत्यू झाला.
यावल आगारातील अनुभवी चालकाच्या आकस्मिक निधनामुळे शहरात हळहळ व्यक्त केली जात आहे. त्यांच्या पश्चात आई, पत्नी, दोन मुली, एक मुलगा आणि नातू असा परिवार आहे. या दुर्दैवी घटनेबाबत यावल आगार व्यवस्थापक दिलीप महाजन यांनी दुःख व्यक्त करत, एसटी महामंडळाच्या वतीने त्यांच्या कुटुंबाला मदत दिली जाईल, असे आश्वासन दिले.
