संशयास्पद जळालेल्या व्यक्तीचा मृत्यू
अमळनेर (प्रतिनिधी )
तालुक्यातील करणखेडा गावात २५ एप्रिलरोजी जळालेल्या अवस्थेत आढळलेल्या ४५ वर्षीय व्यक्तीचा धुळे येथील शासकीय रुग्णालयात उपचार सुरू असताना २७ एप्रिलरोजी मृत्यू झाला. यामुळे परिसरात खळबळ उडाली असून, मारवड पोलीस ठाण्यात २८ एप्रिलरोजी अकस्मात मृत्यूची नोंद करण्यात आली आहे.
महेश पाटील (वय ४५, रा. करणखेडा, सध्या मुक्काम सुरत) असे मृत व्यक्तीचे नाव आहे. त्यांच्या नातेवाईकांनी दिलेल्या माहितीनुसार, महेश पाटील हे कुटुंबासह सुरत येथे वास्तव्यास होते. करणखेडा शिवारात त्यांची शेती असल्याने, ते २५ एप्रिल रोजी सुरतवरून शेती नांगरण्यासाठी गावी आले होते.
२६ एप्रिलरोजी सकाळी ते जळालेल्या अवस्थेत आढळून आले. काही नागरिकांनी त्यांना अमळनेर येथील रुग्णालयात दाखल केले. मात्र, प्रकृती गंभीर असल्याने त्यांना पुढील उपचारासाठी धुळे येथील शासकीय वैद्यकीय महाविद्यालयात हलवण्यात आले. दुर्दैवाने, उपचार सुरू असताना रविवारी त्यांची प्राणज्योत मालवली. महेश पाटील हे कोणत्या कारणामुळे जळाले, याबाबत कोणतीही ठोस माहिती समोर आलेली नाही. मारवड पोलीस तपास करत आहेत.
