अज्ञात ट्रकने दुचाकीस्वाराला चिरडले
जळगाव ( प्रतिनिधी )
खेडी फाट्याजवळ भुसावळकडून जळगावकडे येणाऱ्या दुचाकीस्वराला अज्ञात ट्रकने चिरडल्याची घटना घडली. या अपघातात दुचाकीस्वार तरुण जागीच ठार झाला महेंद्र एकनाथ बोंडे (वय ३८, रा. गणेश कॉलनी, भुसावळ) असे मयत दुचाकीस्वाराचे नाव आहे.
महेंद्र बोंडे आई-वडीलांच्यासह भुसावळ शहरातील गणेश कॉलनीत वास्तव्याला होता. तो जळगाव येथील एमआयडीसीतील गणेश अल्युमिनियम कंपनीमध्ये कामाला होता. दररोज भुसावळ ते जळगाव दुचाकीने जाणेयेणे करत होता. नेहमीप्रमाणे २९ मार्चरोजी सकाळी महेंद्र दुचाकीने भुसावळकडून जळगावला येण्यासाठी निघाला. खेडीफाट्याजवळ अज्ञात ट्रकने त्याला धडक दिली. त्यामुळे तो रोडवर पडला आणि त्याला ट्रकने चिरडले. त्यात महेंद्र बोंडे हे जागीच ठार झाले.
अपघातानंतर ट्रकचालक ट्रक घेऊन फरार झाला. एमआयडीसी पोलीस ठाण्याच्या कर्मचाऱ्यांनी घटनास्थळी पंचनामा करून मृतदेह जिल्हा शासकीय वैद्यकीय महाविद्यालयात दाखल केला. यावेळी नातेवाईकांनी जिल्हा रुग्णालयात धाव घेतली होती. एकुलता एक मुलगा गेल्याने नातेवाईकांनी जिल्हा रुग्णालयात आक्रोश केला होता.
