मंडपाची आग विझविताना शॉक लागल्याने एरंडोल शहरात तरुणाचा मृत्यू
एरंडोल (प्रतिनिधी)-
महात्मा फुले जयंतीनिमित्त लावलेल्या मंडपास लागलेली आग विझवताना ३२ वर्षीय युवकाचा विजेचा धक्का लागून मृत्यू झाल्याची घटना शुक्रवारी मध्यरात्री शहरातील महात्मा फुले पुतळ्याजवळ घडली. एरंडोल पोलीस स्टेशनला अकस्मात मृत्यूची नोंद करण्यात आली आहे.
पंकज गोरख महाजन (वय-३२) असे मयत तरुणाचे नाव आहे. त्याचे पश्चात आई,वडील,पत्नी व तीन मुली असा परिवार आहे. शुक्रवारी शहरातील महात्मा फुले पुतळ्याजवळ महात्मा फुले युवा क्रांती मंचच्या पदाधिका-यांसह विविध संघटनांचे पदाधिकारी व आयोजन समितीचे सदस्य कार्यक्रमाची पूर्वतयारी करीत होते. परिसरात मंडप उभारण्यात आला होता.शुक्रवारी मध्यरात्री मंडपास अचानक आग लागली. मंडपाला लागलेली आग विझवत असतांना पंकज महाजन याचा विजेच्या खांबास स्पर्श झाल्याने तो खाली पडला.
पंकज महाजन यास ग्रामीण रुग्णालयात वैद्यकीय अधिका-यांनी मयत घोषित केले. विजय महाजन यांनी दिलेल्या खबरीवरून एरंडोल पोलीस स्थानकात अकस्मात मृत्यूची नोंद करण्यात आली आहे.का-याचा अचानक मृत्यू झाल्याने महात्मा फुले जयंतीनिमित्त आयोजित सर्व कार्यक्रम रद्द करण्यात आले.
