नवीदिल्ली : वृत्तसंस्था
आमदार अपात्रतेवरून सर्वोच्च न्यायालयाने विधानसभा अध्यक्ष राहुल नार्वेकर यांना सुनावले होते.न्यायालयाने १४ जुलै २०२३ मध्ये या प्रकरणी निकाल दिला. सप्टेंंबर महिन्यातही आदेश दिले पण अद्यापही कारवाई होत नसेल, तर नाईलाजाने २ महिन्यांत निर्णय देण्याचे आदेश द्यावे लागतील, अशा शब्दांत न्यायालयाने विधानसभा अध्यक्ष राहुल नार्वेकरांना फटकारले आहे. यावर आता राहुल नार्वेकर यांनी प्रतिक्रिया दिली आहे.
दिल्लीत प्रसारमाध्यमांशी संवाद साधताना राहुल नार्वेकर म्हणाले,संविधानाने स्थापन केलेल्या कुठल्याही संस्थेच्या आदेशाचा अपमान करणार नाही.त्यामुळे सर्वोच्च न्यायालयाच्या आदेशाचा कुठल्याही प्रकारे अनादर केला जाणार नाही पण, विधानसभा अध्यक्ष म्हणून काम करताना विधिमंडळ आणि विधानसभेचे सार्वभौमत्व राखणे, हे माझे कर्तव्य आहे.
“नैसर्गिक न्याय, तत्व, विधिमंडळातील नियम आणि तरतुदींबरोबर कुठल्याही प्रकारे तडजोड करणार नाही. याचे भान राखत निर्णय घ्यावा लागेल. मी हा निर्णय घेताना सर्वोच्च न्यायालयाच्या आदेशाचा मान ठेवेन,असे राहुल नार्वेकरांनी सांगितले.
“निवडणुकींना समोर ठेवून निर्णय देणार नाही. लवकरात लवकर निर्णय देण्याचा प्रयत्न करणार आहे.संविधानिक तरतुदींचे पालन न करता निर्णय घेतला तर ते चुकीचे ठरेल,असे राहुल नार्वेकरांनी म्हटले.
